Qozogiston prezidenti Qosim Jo‘mart To‘qayev Buxoroga tashrif buyurdi
O‘zbekiston Respublikasi Prezidenti Shavkat Mirziyoyevning taklifiga binoan Qozog‘iston Respublikasi Prezidenti Qosim-Jo‘mart To‘qayev amaliy tashrif bilan mamlakatimizga keldi. Bu haqda Zamin.uz xabar berdi.
Oliy martabali mehmonni Buxoro xalqaro aeroportida davlatimiz rahbari Shavkat Mirziyoyev shaxsan kutib oldi. Mazkur tashrif ikki qo‘shni davlat o‘rtasidagi azaliy do‘stlik, yaxshi qo‘shnichilik va strategik sheriklik munosabatlarining yuksak darajada ekanligini yana bir bor tasdiqlaydi.
Aeroportda tashkil etilgan tantanali kutib olish marosimi ikki xalqning samimiy rishtalarini namoyon etdi. Maydonda ikki davlat bayroqlari ko‘tarilib, faxriy qorovul saf tortdi.
Harbiy orkestr ijrosida O‘zbekiston va Qozog‘iston davlat madhiyalari yangradi. Marosim davomida milliy kuy va qo‘shiqlar ijro etilib, qadimiy Buxoro zaminiga xos bo‘lgan mehmondo‘stlik an’analari ko‘rsatildi.
Tashrif dasturiga ko‘ra, bugun ikki mamlakat rahbarlari tor doirada va kengaytirilgan tarkibda muzokaralar o‘tkazadilar. Muloqot davomida savdo-iqtisodiy, madaniy-gumanitar hamda energetika sohalaridagi hamkorlikni yanada rivojlantirish masalalari ko‘rib chiqiladi.
Shuningdek, davlat rahbarlari Buxoroning boy tarixiy merosi bilan yaqindan tanishish maqsadida shahardagi qadimiy obidalarga tashrif buyuradilar. Bundan tashqari, hududdagi sanoat korxonalari faoliyatini ko‘zdan kechirish va qo‘shma loyihalar ijrosini muhokama qilish ham rejalashtirilgan.
Ushbu amaliy tashrif ikki davlat o‘rtasidagi ko‘p qirrali aloqalarni sifat jihatidan yangi bosqichga olib chiqishiga hamda mintaqadagi barqarorlik va taraqqiyotni ta’minlashga xizmat qilishi kutilmoqda. Tomonlar o‘zaro manfaatli loyihalarni amalga oshirish bo‘yicha muhim kelishuvlarga erishishni maqsad qilgan.
