Turkiyaning Xatay viloyatida Buxoro nomli yangi masjid ochildi
Turkiyaning Xatay viloyatida O‘zbekiston tomonidan bunyod etilgan yangi masjid tantanali ravishda foydalanishga topshirildi. Bu haqda Zamin.uz xabar berdi.
Ushbu ibodat maskani ikki qardosh davlat o‘rtasidagi azaliy do‘stlik va o‘zaro hamkorlikning yorqin namunasi sifatida qad rostladi. Ushbu xayrli loyiha Turkiya hududida yuz bergan og‘ir sinovli davrlarda o‘zbek xalqi ko‘rsatgan yuksak insonparvarlik, birdamlik va beg‘araz yordamga minnatdorlik ramzi o‘laroq amalga oshirildi.
Masjidga qadimiy va navqiron Buxoro shahri sharafiga Buxoro nomi berilgani bejiz emas. Bu nom ikki xalq o‘rtasidagi ma’naviy rishtalar naqadar mustahkam ekanligini yana bir bor tasdiqlaydi.
Yangi ibodatxona uch mingdan ortiq xonadondan iborat yirik turarjoy majmuasining qoq markazida joylashgan bo‘lib, u bir vaqtning o‘zida besh yuz nafargacha namozxonni qabul qilish imkoniyatiga ega. Binoning me’moriy yechimi milliy an’analarimiz va zamonaviy qurilish talablarini o‘zida mujassam etgan bo‘lib, o‘zining estetik ko‘rinishi hamda qulay sharoitlari bilan mahalliy aholida katta qiziqish uyg‘otmoqda.
Tadbir yakunida so‘zga chiqqan rasmiylar va jamoatchilik vakillari mazkur loyiha ikki davlat o‘rtasidagi birodarlik aloqalarini hamda gumanitar hamkorlikni yanada rivojlantirishga xizmat qilishini alohida ta’kidladilar. Bunday ezgu tashabbuslar xalqlarimiz o‘rtasidagi ishonch va hurmatni yanada mustahkamlashga, kelajak avlodlar uchun o‘zaro yordamning go‘zal namunasi bo‘lib qolishiga xizmat qiladi.
Masjid nafaqat ibodat maskani, balki ikki xalqning birligi va hamjihatligini ifodalovchi muhim madaniy markazga aylanishi kutilmoqda.
