O‘zbekistonda aprel o‘rtalarida kuchli yomg‘ir va shamol kutilmoqda
O‘zbekiston hududiga joriy yilning 14-17 aprel kunlari nam va salqin havo massalari kirib kelishi kutilmoqda. Bu haqda Zamin.uz xabar berdi.
Gidrometeorologiya xizmati agentligi ushbu ob-havo o‘zgarishlari yuzasidan tezkor ogohlantirish e’lon qildi. Prognozlarga ko‘ra, 14 aprel kuni mamlakatning shimoli-g‘arbiy hududlarida yomg‘ir yog‘ishi boshlanadi.
15-17 aprel kunlari esa yog‘ingarchilik respublikaning aksariyat viloyatlarini qamrab oladi. Ayrim hududlarda yomg‘ir kuchli yog‘ishi va momaqaldiroq bo‘lishi ehtimoli bor.
Tog‘li hududlarda esa havo haroratining pasayishi sababli yomg‘ir qorga aylanishi kutilmoqda. Ob-havo sharoitining o‘zgarishi shamol tezligining kuchayishiga ham olib keladi.
Respublikaning ayrim joylarida shamol tezligi soniyasiga 15-20 metrga, ba’zi hududlarda esa 25-28 metrgacha yetishi mumkin. Shuningdek, 14-15 aprel kunlari ayrim hududlarda chang-to‘zon kuzatilishi ehtimoli mavjud.
Havo harorati ham sezilarli darajada pasayadi. 15-17 aprel kunlari kunduzgi harorat asta-sekin pasayib, 13-16 daraja iliq atrofida bo‘lishi kutilmoqda.
Mutaxassislar bunday noqulay ob-havo sharoitida fuqarolardan ehtiyotkor bo‘lishni so‘ramoqda. Ayniqsa, tog‘li hududlarga borishni rejalashtirgan fuqarolardan barcha xavfsizlik qoidalariga rioya etish va ob-havo o‘zgarishlarini inobatga olish tavsiya etiladi.
Kuchli shamol va yog‘ingarchilik vaqtida ochiq havoda yurishda, shuningdek, avtomobillarni daraxtlar va elektr simyog‘ochlari ostiga qo‘ymaslikda ehtiyot bo‘lish lozim. Ob-havo ma’lumotlarini kuzatib borish va rasmiy xabarlarga tayanish tavsiya qilinadi.
