Uy bekalari ham tugurug nafaqasini olish imkoniyatiga ega bo ladi
O'zbekistonda ijtimoiy himoya tizimini yanada takomillashtirish maqsadida muhim o'zgarishlar kiritilmoqda. Bu haqda Zamin.uz xabar berdi.
Endilikda uy bekalari ham homiladorlik va tug'ruq davridagi nafaqalardan foydalanish imkoniyatiga ega bo'ladilar. Ushbu yangi tartib 2026 yildan boshlab amalkan qilinishi kutilmoqda.
Avvalgi tizimda ushbu nafaqalar asosan rasmiy ish joyida mehnat qilgan ayollar uchun belgilangan edi. Endilikda esa uyda oilasiga g'amxo'rlik qilayotgan ayollar ham ijtimoiy sug'urta imkoniyatlaridan foydalanishlari mumkin bo'ladi.
Buning uchun fuqarolar o'zlarini o'zi band qilgan shaxs sifatida rasmiy ro'yxatdan o'tkazishlari va davlatning ijtimoiy sug'urta tizimiga ulanishlari lozim. Yangi tartibga ko'ra, nafaqa olish huquqini qo'lga kiritish uchun ma'lum shartlar bajarilishi kerak.
Xususan, uy bekalari har oyda 63 ming 550 so'm miqdorida sug'urta badallarini to'lab borishlari lozim. Shuningdek, ushbu to'lovlar kamida o'n oy davomida uzluksiz ravishda amalga oshirilgan bo'lishi shart.
Ushbu tizimga a'zo bo'lgan va belgilangan to'lovlarni muntazam amalga oshirgan ayollar kelajakda homiladorlik va tug'ruq davrida 4 million so'mgacha miqdordagi nafaqani olish imkoniyatiga ega bo'ladilar. Mazkur chora uy bekalari ijtimoiy himoyasini kuchaytirish va ularning moddiy holatini yaxshilashga xizmat qiladi.
Ushbu yangilik ayollarning jamiyatdagi o'rnini tan olish va ularga munosib ijtimoiy kafolatlar taqdim etish yo'lidagi muhim qadamdir. Davlat tomonidan joriy etilayotgan ushbu imtiyozlar oilalarda farzand tarbiyasi va onalik davrini yanada xotirjam o'tkazishga yordam beradi.
