Uyushgan jinoyatchilik va bezorilik uchun jazolar ogirlashadi
Oliy Majlis deputatlari yig‘ilishida uyushgan jinoyatchilikka va jamoat joylaridagi huquqbuzarliklarga qarshi kurashni kuchaytirishga qaratilgan yangi qonun loyihasi muhokama qilindi. Bu haqda Zamin.uz xabar berdi.
Parlament a’zolari tomonidan amaldagi qonunchilikda ayrim kamchiliklar mavjudligi, natijada uyushgan guruhlar sodir etgan bezoriliklar uchun yengil jazo choralari qo‘llanilayotgani ta’kidlandi. Bu holat jamiyatda noto‘g‘ri tushunchalar shakllanishiga va jazosizlik muhitining kuchayishiga olib kelayotgani qayd etildi.
Yangi qonun loyihasiga ko‘ra, bezorilik jinoyati uchun javobgarlik sezilarli darajada og‘irlashtirilmoqda. Hujjatda bir guruh shaxslar tomonidan takroran sodir etilgan, qurol qo‘llanilgan yoki huquqni muhofaza qiluvchi organlar xodimlariga qarshilik ko‘rsatilgan holatlar uchun qattiqroq jazo choralari belgilanishi ko‘zda tutilgan.
Taklif etilayotgan o‘zgartirishlar doirasida Jinoyat kodeksining tegishli moddasi yangi qism bilan to‘ldiriladi. Shunga ko‘ra, uyushgan guruh tomonidan yoki og‘ir tan jarohati yetkazilgan holda sodir etilgan bezorilik uchun 8 yildan 10 yilgacha ozodlikdan mahrum qilish jazosi joriy etiladi.
Taqqoslaganda, hozirgi amaldagi qonunlar bo‘yicha bunday jinoyatlar uchun maksimal 8 yilgacha qamoq jazosi nazarda tutilgan edi. Shuningdek, o‘z mansab vakolatidan foydalanib jinoiy guruhlarni qo‘llab-quvvatlagan shaxslarga nisbatan ham qat’iy choralar ko‘riladi.
Bunday shaxslar uchun shartli ozodlikdan avval chiqarish imkoniyati cheklanishi mumkin. Biroq, agar shaxs jinoiy guruh faoliyati haqida oldindan xabar berib, og‘ir oqibatlarning oldini olishga yordam bersa, u javobgarlikdan ozod etilishi mumkinligi aytildi.
Qonun loyihasining yana bir muhim jihati shuki, jangovar sport turlari bo‘yicha musobaqalarni noqonuniy tashkil etish yoki o‘tkazish uchun jinoiy javobgarlik joriy etilmoqda. Tahliliy ma’lumotlarga ko‘ra, yaqin vaqtlar ichida MMA va shunga o‘xshash bir necha noqonuniy musobaqalar o‘tkazilgani aniqlangan.
Muhokamalar yakunida ushbu qonun loyihasi birinchi o‘qishda ma’qullandi. Hujjat keyingi bosqichlarda yanada kengroq ko‘rib chiqilib, yakuniy qaror qabul qilinishi kutilmoqda.
