O‘zbekistonning ko‘plab hududlarida beqaror ob havo sharoiti kutilmoqda

O‘zbekiston hududida 16 aprel kuni ob havo sharoitlari beqaror bo‘lishi kutilmoqda. Bu haqda Zamin.uz xabar berdi.

Respublika ko‘plab viloyatlarida osmon bulutli bo‘lib, ayrim hududlarda yomg‘ir yog‘ishi ehtimoli yuqori. Havo harorati bahor fasliga xos ravishda iliq bo‘lishi kutilsa da, quyoshli kunlar kamroqligi prognoz qilinmoqda.

Qoraqalpog‘iston Respublikasi va Xorazm viloyatlarida osmon bulutli bo‘lib, ba’zi joylarda shamol va qisqa muddatli yomg‘irlar kuzatiladi. Ushbu hududlarda kunduzi havo harorati 18 darajadan 22 darajagacha, kechasi esa 7 darajadan 10 darajagacha bo‘ladi.

Buxoro va Navoiy viloyatlarida ham bulutli havo ustunlik qiladi. Buxoroda shamol kuchayishi va qisman yomg‘ir yog‘ishi mumkin, harorat kunduzi 18-20 daraja, kechasi 11-15 darajani tashkil etadi.

Navoiy viloyatida esa kunduzi 20-23 daraja, kechasi 8-10 daraja issiqlik kuzatiladi. Toshkent shahri va viloyatida yomg‘irli va bulutli ob havo kutilmoqda.

Kunduzi harorat 13-18 daraja, kechasi esa 8-10 darajani ko‘rsatadi. Sirdaryo va Jizzax viloyatlarida ham yog‘ingarchilik ehtimoli yuqori bo‘lib, ayniqsa tog‘li hududlarda yomg‘ir yog‘ishi mumkin.

Samarqand viloyatida havo biroz salqinlashib, kunduzi 14-18 daraja, kechasi 8-10 darajani tashkil etadi. Qashqadaryo va Surxondaryo viloyatlarida bulutli havo kuzatiladi.

Surxondaryoda harorat nisbatan yuqori bo‘lib, kunduzi 23-27 darajagacha ko‘tarilishi mumkin. Vodiy viloyatlari, ya’ni Farg‘ona, Andijon va Namangan viloyatlarida osmon bulutli bo‘lib, yomg‘ir yog‘ish ehtimoli yuqori.

Bu hududlarda kunduzi harorat 19-22 daraja, kechasi esa 9-11 daraja atrofida bo‘ladi.