Prezident Javohir Sindorovni tarixiy g‘alabasi uchun davlat mukofoti bilan taqdirladi
Prezident Shavkat Mirziyoyev ishtirokida O‘zbekiston shaxmati tarixida yangi sahifa ochgan grossmeyster Javohir Sindorovni sharaflash marosimi bo‘lib o‘tdi. Bu haqda Zamin.uz xabar berdi.
Tadbir davomida mamlakat rahbari sportchining ulkan yutuqlarini e’tirof etib, unga davlat mukofotini shaxsan topshirdi. Javohir Sindorov Xalqaro shaxmat federatsiyasi tomonidan tashkil etilgan Nomzodlar turnirida g‘olib chiqish bilan yurtimiz shaxmat olamida mislsiz natijani qayd etdi.
U musobaqa davomida dunyoning eng kuchli grossmeysterlariga qarshi yuksak mahorat, sabr va mustahkam iroda namoyon etdi. Turnirning eng diqqatga sazovor jihati shundaki, shaxmatchi o‘n to‘rt partiya davomida birorta ham mag‘lubiyatga uchramadi.
U jami o‘n ochko to‘plab, rekord darajadagi natijani ko‘rsata oldi. Ushbu yutuq xalqaro shaxmat hamjamiyati tomonidan noyob hodisa sifatida yuqori baholanmoqda.
Prezident marosimda so‘zga chiqib, ushbu g‘alaba faqatgina Javohir Sindorovning shaxsiy muvaffaqiyati emas, balki butun Yangi O‘zbekistonning zafari ekanini ta’kidladilar. Davlat rahbari sportchining yutuqlari zamirida uzoq yillik tinimsiz mehnat, ustozlar yo‘l-yo‘riqlari, ota-ona duosi va qat’iy intizom yotganini alohida qayd etdi.
Shuningdek, Prezident O‘zbekistonda shaxmat sportiga berilayotgan katta e’tibor tufayli dunyo reytingining kuchli beshligiga kirgan ikki nafar o‘zbek grossmeysteri borligi haqida faxr bilan so‘zladi. Bu holat milliy shaxmat maktabining salohiyati va nufuzi xalqaro maydonda tobora ortib borayotganidan dalolat beradi.
Tadbir davomida Javohir Sindorovning kelgusidagi maqsadlari ham muhokama qilindi. Uning jahon shaxmat toji uchun kurashda munosib ishtirok etishi hamda 2026-yilda Samarqand shahrida bo‘lib o‘tadigan Shaxmat olimpiadasida O‘zbekiston sha’nini baland ko‘tarishiga ishonch bildirildi.
Marosim yakunida Javohir Sindorovga davlatning oliy mukofotlaridan biri bo‘lgan Mehnat shuhrati ordeni tantanali ravishda topshirildi. Sportchi o‘z navbatida Prezident va xalq tomonidan bildirilgan yuksak ishonch uchun chuqur minnatdorchilik izhor etdi.
