Tadbirkorlar bank hisobvaraqlarini blokdan chiqarish tartibi soddalashtiriladi
O‘zbekiston Respublikasi Qonunchilik palatasi deputatlari tadbirkorlarning bank hisobvaraqlarini bloklash va blokdan chiqarish tartibini soddalashtirishga qaratilgan qonun loyihasini birinchi o‘qishda qabul qildilar. Bu haqda Zamin.uz xabar berdi.
Mazkur hujjat Iqtisodiy protsessual kodeks hamda Soliq kodeksiga tegishli o‘zgartishlar kiritishni ko‘zda tutadi. Yangi tartibga ko‘ra, agar tadbirkor soliq qoidalarini buzganini tan olgan holda tegishli qarorga e’tiroz bildirmasa, hisobvaraqlarini vaqtincha bloklash to‘g‘risidagi qaror bevosita soliq organi tomonidan qabul qilinadi.
Shuningdek, aniqlangan qoidabuzarliklar bartaraf etilgach, bank hisobvaraqlaridagi cheklovlarni olib tashlash jarayoni ham soliq xizmati orqali ancha soddalashtiriladi. Ushbu chora biznes vakillarini ortiqcha sud jarayonlaridan xalos etish hamda korxona faoliyatini tezroq tiklash imkonini beradi.
Biroq, agar soliq to‘lovchi qabul qilingan qarorga rozi bo‘lmasa, hisobvaraqlar bo‘yicha operatsiyalarni to‘xtatish masalasi avvalgidek faqat iqtisodiy sud tomonidan ko‘rib chiqilishi davom etadi. Shuni ta’kidlash joizki, mamlakatda soliq ma’murchiligi tizimining yangi bosqichi joriy etilmoqda.
Korxonalarni xavf darajasiga qarab yashil, sariq va qizil zonalarga ajratish orqali tadbirkorlik subyektlariga jami sakkiz trillion so‘mdan ortiq mablag‘ni tejash imkoniyati yaratilishi kutilmoqda. Bu tizim soliq nazoratini yanada shaffof qilish va biznes muhitini yaxshilashga xizmat qiladi.
