Prezident cheklangan javobgarlikdagi jamiyatlar to‘g‘risidagi yangi qonunni imzoladi
O‘zbekiston Respublikasi Prezidenti Shavkat Mirziyoyev cheklangan javobgarlikdagi jamiyatlar to‘g‘risidagi qonunning yangi tahririni imzoladi. Bu haqda Zamin.uz xabar berdi.
Adliya vazirligi tomonidan tayyorlangan ushbu hujjat mamlakatda korporativ boshqaruvning zamonaviy standartlarini joriy etish hamda ushbu turdagi jamiyatlar faoliyatini tartibga solishdagi huquqiy bo‘shliqlarni bartaraf etishga xizmat qiladi. Shuningdek, yangi qonun jamiyat ishtirokchilarining huquqlarini yanada mustahkamlashni ko‘zda tutgan.
Jami 71 moddadan iborat bo‘lgan ushbu hujjat rasmiy e’lon qilinganidan uch oy o‘tgach kuchga kiradi. Qonun loyihasini ishlab chiqish jarayonida mahalliy va xorijiy mutaxassislarning fikrlari, jamoatchilik takliflari hamda xalqaro tajribalar keng ko‘lamda hisobga olingan.
Yangi qonun bilan jamiyatning kuzatuv kengashi vakolatlari va uning a’zolarini saylash tartibi aniq belgilab qo‘yildi. Bu chora korporativ nizolarning oldini olishga yordam beradi.
Bundan tashqari, kuzatuv kengashiga yig‘ilishlar o‘tkazmasdan, masofadan turib qaror qabul qilish imkoniyati yaratildi. Hujjatda birinchi bor kuzatuv kengashi va ijro organlari a’zolarining maxsus majburiyatlari tasdiqlandi, bu esa xalqaro korporativ boshqaruv amaliyotiga to‘liq mos keladi.
Jamiyatlar faoliyatining huquqiy asoslari yanada kengaytirildi. Endilikda ular nafaqat litsenziyalar, balki boshqa ruxsat berish va xabardor qilish tartiblari doirasida ham ish yuritish imkoniyatiga ega bo‘ladilar.
Filiallar, vakolatxonalar hamda sho‘ba korxonalarni tashkil etish masalalari alohida tartibga solindi. Qonunda ustav kapitaliga hissasini kiritmagan yoki jamiyat faoliyatiga to‘sqinlik qilayotgan ishtirokchilarni chiqarib yuborish mexanizmlari belgilandi.
Shuningdek, ishtirokchilar o‘rtasidagi ulushlar bo‘yicha sud nizolari davrida ustav fondini o‘zgartirishga cheklovlar qo‘yish imkoniyati yaratildi. Hissalarni Markaziy qimmatli qog‘ozlar depozitariysi orqali hisobga olish, ozchilik ishtirokchilari qo‘mitasini tuzish hamda audit va manfaatdor shaxslar bilan bitimlar bo‘yicha qoidalarni takomillashtirish ko‘zda tutilgan.
Yangi tahrirdagi qonun investitsiya muhitini yaxshilash, xorijiy sarmoyalarni jalb qilish hamda mamlakatda shaffof va barqaror korporativ muhitni shakllantirishga qaratilgan.
