MCHJlar faoliyatini tartibga soluvchi qonun yangi tahrirda qabul qilindi
O'zbekistonda mas'uliyati cheklangan jamiyatlarning faoliyatini tartibga soluvchi qonunning yangi tahriri qabul qilindi. Bu haqda Zamin.uz xabar berdi.
Ushbu hujjat rasmiy e'lon qilingan sanadan uch oy o'tgach amalda kuchga kiradi. Adliya vazirligi tomonidan tayyorlangan va davlat rahbari tomonidan imzolangan ushbu qonun sohaga uzoq vaqtdan buyon kutilayotgan muhim islohotlarni olib kiradi.
Yangi qonun bilan mas'uliyati cheklangan jamiyatlarda zamonaviy korporativ boshqaruv tamoyillari joriy etiladi. Hujjatning asosiy maqsadi mavjud huquqiy bo'shliqlarni bartaraf etish hamda korxona ishtirokchilarining huquq va kafolatlarini yanada mustahkamlashdir.
Jami 71 ta moddadan iborat ushbu qonunni ishlab chiqish jarayonida mahalliy va xorijiy ekspertlarning takliflari, jamoatchilik fikrlari hamda xalqaro ilg'or tajribalar keng ko'lamda inobatga olingan. Hujjatdagi asosiy yangiliklar orasida kuzatuv kengashining vakolatlari aniq va batafsil tartibga solinishi alohida ajralib turadi.
Endilikda kengash a'zolarini saylash mexanizmi shaffof bo'ladi. Shuningdek, kengash qarorlarini masofadan yoki sirtdan ovoz berish orqali qabul qilish imkoniyati yaratiladi.
Bu esa boshqaruv jarayonlarini tezlashtirishga xizmat qiladi. Yana bir muhim o'zgarish sifatida kuzatuv kengashi a'zolari va ijro organlari uchun maxsus ishonch majburiyatlari joriy etilmoqda.
Bu chora rahbarlarning mas'uliyati va shaffofligini oshirishga qaratilgan. Bundan tashqari, mas'uliyati cheklangan jamiyatlar faoliyat yuritish tartibiga o'zgartirishlar kiritildi.
Endilikda ular faqat lisenziya asosida emas, balki ayrim hollarda ruxsatnoma yoki xabar berish tartibi orqali ham ish yuritishi mumkin bo'ladi. Shuningdek, jamiyatlarning filial va vakolatxonalarini tashkil etish, sho'ba korxonalarni ochish tartibi ilk bor alohida huquqiy norma sifatida qonunda mustahkamlandi.
