O‘zbekiston bandlik reytingida 114 o‘rinni egalladi
Xalqaro mehnat tashkiloti tomonidan 2025 yil uchun tayyorlangan hisobotga asosan, jahon davlatlarida bandlik darajasi bo‘yicha reyting e’lon qilindi. Bu haqda Zamin.uz xabar berdi.
Ushbu ro‘yxatda dunyoning 187 mamlakatlari qiyoslangan bo‘lib, O‘zbekiston 114 o‘rinni egalladi. Bu ko‘rsatkich mamlakatimizda mehnatga layoqatli aholining 55 foizi band ekanligini anglatadi.
Bu yerda bandlik deganda, ish bilan band bo‘lgan, mehnat shartnomasi asosida yoki mustaqil faoliyat olib borayotgan barcha fuqarolar nazarda tutiladi. Mutaxassislarning ta’kidlashicha, O‘zbekistonda bandlik darajasiga bir qator omillar ta’sir ko‘rsatmoqda.
Jumladan, oliy o‘quv yurtlarida tahsil oluvchi yoshlarning ko‘pligi, uy xo‘jaliklarida band bo‘lgan ayollar, shuningdek, rasmiy statistikaga aks etmaydigan norasmiy sektordagi ishchilar asosiy bandlik ko‘rsatkichiga to‘liq kirmaydi. Shu sababli, amaliyotda mehnat bozoridagi holat hisobotdagi raqamlarga qaraganda yaxshiroq bo‘lishi mumkin.
Hududiy qo‘shnilarning ko‘rsatkichlari bilan solishtirganda, Qozog‘iston 67 foiz bilan 29, Belarus 61 foiz bilan 67, Rossiya 60 foiz bilan 73 o‘rinda joy olgan. Qirg‘iziston 111, Tojikiston esa 175 o‘rinda turadi.
Bu solishtirish O‘zbekistonning mintaqadagi o‘rni va rivojlanish potensialini aniq ko‘rsatadi. Iqtisodiy taraqqiyot uchun bandlik darajasini oshirish juda muhiy vazifa hisoblanadi.
Buning uchun yangi korxonalar va ish o‘rinlarini yaratish, tadbirkorlikni qo‘llab-quvvatlash, norasmiy bandlikni rasmiylashtirish kabi chora-tadbirlarni amalga oshirish talab etiladi. Bu borada davlat tomonidan olinafyotgan izchil qadamlar ijobiy natijalar bermoqda.
Kelgusida bandlik darajasining yanada oshishi kutilmoqda.
