Prezident qurilish bojxona to‘lovlarni kamaytirishga buyruq berdi
Prezident Shavkat Mirziyoyev raisligida qurilish va shaharsozlik sohasidagi dolzarb masalalar yuzasidan yig‘ilish bo‘lib o‘tdi. Bu haqda Zamin.uz xabar berdi.
Unda qurilish sohasi vakillari mamlakatda ishlab chiqarilmaydigan maxsus texnikalarni olib kirishda to‘lanadigan bojxona to‘lovlari va utilizatsiya yig‘imlari haqidagi muammolarni ochiq aytdilar. Spot.uz saytiga ko‘ra, ushbu to‘lovlar qurilish narxlari ortib ketishiga olib kelmoqda.
Lux City Houses korxonasi rahbari Vohidjon Mirzayevning aytishicha, O‘zbekistonda ishlab chiqarilmaydigan qurilish mashinalari uchun qo‘llanilayotgan ushbu majburiy to‘lovlarni kamaytirish kichik va o‘rta biznesga katta yordam bo‘ladi. Bu esa qurilish tannarxini pasaytiradi va natijada turar-joy narxlari ham arzonlashadi.
Davlat rahbari ushbu masalaga alohida e’tibor qaratdi. Qurilish hajmini oshirish, bu sohaga qiziqishni yanada oshirish uchun sharoit yaratish lozimligi ta’kidlandi.
Prezident O‘zbekistonda ishlab chiqarilmaydigan, ayniqsa, qimmat texnologiyaga ega bo‘lgan qurilish texnikalari uchun import bojlarini kamaytirish, dastlabki bosqichda esa ulardan to‘liq ozod qilish bo‘yicha loyiha tayyorlash vazifasini berdi. Qurilish va uy-joy kommunal xo‘jaligi vaziri Sherzod Hidoyatov aytganidek, 2017-yilda ham maxsus qurilish texnikalarini import qilishda imtiyozlar joriy qilingan edi.
Ushbu chora-tadbirlar o‘sha davrda sohaga ijobiy ta’sir ko‘rsatgan va qurilish jarayonini tezlantirgan edi. Hozir ham shunga o‘xshash yondashuv qayta joriy qilinmoqda.
