Hafta o'rtasida O'zbekistonda ob-havo o'zgarib harorat pasayishi kutilmoqda
O'zbekiston hududida joriy haftaning birinchi yarmida ob-havo sharoitida o'zgarishlar kuzatilib, havo harorati biroz pasayishi kutilmoqda. Bu haqda Zamin.uz xabar berdi.
O'zgidromet xizmati agentligi bergan ma'lumotlarga ko'ra, dastlabki kunlarda mamlakatimizda barqaror va iliq havo hukm suradi, biroq haftaning o'rtalariga kelib atmosfera bosimining o'zgarishi natijasida ob-havo nobarqarorlashadi. Xususan, 20-aprel dushanba kuni respublikaning aksariyat hududlarida quruq va iliq ob-havo saqlanib qoladi.
Faqat Qoraqalpog'iston Respublikasi hamda Xorazm viloyatining ayrim joylarida qisqa muddatli yomg'ir yog'ishi va momaqaldiroq bo'lishi ehtimoli bor. Shu kuni kunduzi havo harorati 24-29 daraja iliq atrofida bo'lishi taxmin qilinmoqda.
Haftaning keyingi kunlarida, ya'ni 21-23-aprel sanalarida respublikaning turli viloyatlarida yomg'ir yog'ishi kutilmoqda. 21-aprelda havo harorati yuqori darajada saqlanib qolsa-da, 22-23-aprel kunlari termometr ko'rsatkichlari asta-sekin pasayib, 18-23 darajani tashkil etadi.
Shuningdek, 20-22-aprel kunlari ba'zi hududlarda shamol tezligi soniyasiga 15-20 metrgacha kuchayishi va ayrim joylarda chang-to'zonlar ko'tarilishi mumkin. Hafta yakuniga borib ob-havo yana o'zgaradi.
24-apreldan boshlab barcha hududlarda yog'ingarchilik to'xtab, havo harorati qaytadan ko'tarila boshlaydi. Tog'li va tog'oldi hududlarda esa vaqti-vaqti bilan yomg'ir yog'ishi davom etishi mumkin.
Mutaxassislar ushbu hududlarda sel kelishi va suv toshqinlari yuzaga kelishi xavfidan ogohlantirmoqda. Poytaxtimiz Toshkent shahrida dushanba kuni yog'ingarchilik kutilmaydi.
Seshanba kuni kunning ikkinchi yarmida qisqa muddatli yomg'ir yog'ishi va momaqaldiroq bo'lishi mumkin. Shaharda harorat haftaning birinchi yarmida 25-28 daraja bo'lsa, payshanba kuniga kelib 20-22 darajagacha tushadi.
Juma kunidan boshlab poytaxtda yana quyoshli va iliq ob-havo qaytishi, harorat 27 darajagacha ko'tarilishi kutilmoqda.
