Urush qatnashchilariga 30 million so‘m pul mukofoti beriladi
O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyevga harbiy xizmatchilarni ijtimoiy himoya qilish, zaxiradagi ofitserlarni tayyorlash tizimini rivojlantirish hamda Xotira va qadrlash kuniga ko‘rilayotgan tayyorgarlik jarayonlari haqida hisobot berildi. Bu haqda Zamin.uz xabar berdi.
Taqdim etilgan ma’lumotlarga ko‘ra, joriy yilda mamlakatimizda 9-may bayrami munosabati bilan Ikkinchi jahon urushi qatnashchilari va nogironlarini moddiy rag‘batlantirishga alohida e’tibor qaratiladi. Xususan, urush faxriylariga 30 million so‘m miqdorida bir martalik pul mukofoti berish taklif etilmoqda.
Bu chora-tadbirlar keksa avlod vakillariga ko‘rsatilayotgan yuksak ehtiromning amaliy ifodasidir. Bayram tadbirlari doirasida nafaqat urush qatnashchilari, balki front ortida mehnat qilgan faxriylar, nuroniylar va ustozlar ham yo‘qlanadi.
Yolg‘iz yashayotgan va ijtimoiy himoyaga muhtoj keksalar holidan xabar olish, ularning uy-joylarini ta’mirlash hamda obodonlashtirish ishlari rejalashtirilgan. Shuningdek, mustaqillik yillarida o‘z xizmat vazifasini bajarish chog‘ida qahramonlarcha halok bo‘lgan harbiy xizmatchilarning xotirasi yod etilib, ularning oila a’zolariga moddiy va ma’naviy ko‘mak beriladi.
Bu boradagi ishlar tizimli ravishda davom ettirilishi belgilangan. Harbiy xizmatchilarning turmush sharoitini yaxshilash maqsadida mudofaa tizimida muhim o‘zgarishlar amalga oshiriladi.
Ofitserlar tarkibiga xizmat muddati uchun to‘lanadigan oylik ustamalar miqdori ikki barobarga oshirilishi kutilmoqda. Shuningdek, shartnoma asosida xizmat qilayotgan oddiy askar va serjantlarning ish haqi miqdori 10 foizga ko‘paytiriladi.
Bunday chora-tadbirlar Vatan himoyachilarining ijtimoiy nufuzini oshirish va ularning fidokorona mehnatini munosib baholashga xizmat qiladi. Kadrlar tayyorlash tizimini takomillashtirish yo‘nalishida ham yangi loyihalar amalga oshirilmoqda.
Bugungi kunda bir qator oliy ta’lim muassasalarida zaxira ofitserlarini tayyorlash yo‘lga qo‘yilgan bo‘lib, kelgusida Urganch, Termiz, Andijon va Samarqand shaharlaridagi yirik oliy o‘quv yurtlari bazasida yana beshta harbiy tayyorgarlik markazi tashkil etiladi. Shu bilan birga, oliy ta’lim muassasalarida chaqiriqqacha harbiy ta’lim yo‘nalishi bo‘yicha uch yillik bakalavriat tizimi joriy etiladi.
Harbiy tibbiyot sohasida ham magistratura va ordinatura talabalari uchun maxsus tayyorgarlik imkoniyatlari kengaytiriladi. Ushbu yangilanishlar mamlakatimiz mudofaa qudratini yanada mustahkamlashga qaratilgan.
