Yevropa Ittifoqi O‘zbekistonning ikkita yirik korxonasiga sanksiya joriy etdi
Yevropa Ittifoqi O‘zbekistonda faoliyat ko‘rsatayotgan ikkita yirik korxonaga nisbatan cheklov choralarini joriy etdi. Bu haqda Zamin.uz xabar berdi.
Mazkur sanksiyalar ro‘yxatiga paxta sellyulozasi ishlab chiqaruvchi Raw Materials Cellulose kompaniyasi hamda Farg‘ona kimyo zavodi kiritilgan. Ma’lumki, Farg‘ona kimyo zavodi Rustam Mo‘minov nazoratida faoliyat yuritadi.
Xalqaro tashkilot tomonidan e’lon qilingan ma’lumotlarga ko‘ra, ushbu korxonalar tomonidan ishlab chiqarilgan mahsulotlar Rossiyaning Perm, Qozon va Tambov shaharlaridagi porox tayyorlovchi zavodlarga yetkazib berilgan. Yevropa Ittifoqi rasmiylarining xulosasiga ko‘ra, mazkur xomashyolar keyinchalik harbiy maqsadlarda ishlatilgan va tayyorlangan poroxlar Rossiya armiyasi ixtiyoriga topshirilgan.
Yevropa Ittifoqi ushbu holatni jiddiy qoidabuzarlik deb baholadi va tegishli choralar ko‘rishga qaror qildi. Joriylangan sanksiyalar natijasida ushbu korxonalarning Yevropa bozoriga kirishi cheklanadi.
Shuningdek, ularning moliyaviy operatsiyalari qat’iy nazoratga olinib, xalqaro hamkorlik imkoniyatlari sezilarli darajada qisqartirilishi kutilmoqda. Ushbu qaror O‘zbekistonning ayrim sanoat korxonalari uchun tashqi savdo va xalqaro munosabatlar borasida yangi qiyinchiliklarni keltirib chiqarishi mumkin.
Hozircha korxonalar rahbariyati yoki tegishli davlat organlari tomonidan ushbu masala yuzasidan rasmiy munosabat bildirilmagan.
