Ayrim hududlarda kartoshka ekish kechikishi sababli narxlar oshdi
O‘zbekistonda joriy yilda kartoshkaga bo‘lgan ichki ehtiyojni to‘liq qondirish maqsadida 180 ming gektar maydonga ekin ekish belgilangan edi. Bu haqda Zamin.uz xabar berdi.
Bugungi kunga kelib ushbu yerlarning 118 ming gektarida ekish ishlari nihoyasiga yetkazildi. Shunga qaramay, mamlakatning ayrim hududlarida bu boradagi ko‘rsatkichlar belgilangan rejadan ancha orqada qolayotgani kuzatilmoqda.
Xususan, Qashqadaryo viloyatida rejalashtirilgan maydonlarning atigi 41 foiziga, Surxondaryo viloyatida esa 44 foiziga kartoshka ekilgan, xolos. Ekish ishlarining o‘z vaqtida amalga oshirilmagani va kechikishi ichki bozorlardagi narx-navoning ko‘tarilishiga bevosita sabab bo‘ldi.
Tahlillarga ko‘ra, mart oyining o‘zida kartoshka narxi Surxondaryo viloyatida 12,4 foizga, Qashqadaryo viloyatida esa 9 foizga oshganligi qayd etildi. Bu holat aholining kundalik ehtiyojlari uchun zarur bo‘lgan mahsulotlar ta’minotida uzilishlar xavfini yuzaga keltirmoqda.
Kartoshka yetishtirishga ixtisoslashgan Xo‘jaobod, Andijon, Kosonsoy, Chortoq, Chust, Yangiqo‘rg‘on, Toshloq va Farg‘ona tumanlarida ham ishlar talab darajasida tashkil etilmagan. Mazkur hududlarda yo‘l qo‘yilgan sustkashliklar oqibatida viloyat hokimlarining qishloq xo‘jaligi masalalari bo‘yicha o‘rinbosarlari hamda tuman hokimlarining mas’uliyati va faoliyati tanqidiy ko‘rib chiqildi.
Mutasaddi rahbarlarga mavjud kamchiliklarni qisqa muddatda bartaraf etish bo‘yicha qat’iy topshiriqlar berildi. Prezident Shavkat Mirziyoyev oziq-ovqat xavfsizligini ta’minlash masalasiga alohida to‘xtalib, ushbu yo‘nalishda barcha zaruriy imkoniyatlar yaratilganini ta’kidladi.
Davlat rahbari mablag‘ va resurslar yetarli ekanini, go‘sht hamda kartoshka kabi hayotiy muhim mahsulotlar ta’minotida hech qanday muammo bo‘lmasligi shartligini qat’iy uqtirdi. Endilikda har bir hudud rahbari o‘z hududida oziq-ovqat barqarorligini saqlash uchun shaxsan javobgar bo‘ladi.
