O'zbekistonda beshta yangi yirik sel va suv ombori quriladi
O‘zbekiston Respublikasi Prezidenti Shavkat Mirziyoyev tomonidan imzolangan sel va toshqin suvlaridan samarali foydalanishga doir yangi qaror mamlakatimiz suv xo‘jaligi tizimida muhim burilish yasashi kutilmoqda. Bu haqda Zamin.uz xabar berdi.
Mazkur hujjatga muvofiq, 2027–2030-yillar davomida respublikamizning turli hududlarida beshta yirik sel-suv ombori barpo etiladi. Ushbu loyihalar asosan Jizzax, Samarqand va Toshkent viloyatlarining tog‘li hamda tog‘oldi hududlarini qamrab oladi.
Yangi suv inshootlarini qurish uchun aniq manzillar belgilab olindi. Jumladan, Jizzax viloyatining Baxmal tumanidagi Tangatopdisoy, Samarqand viloyatining Urgut tumanidagi G‘ijduvonsoy va Choshtepasoy, Qo‘shrabot tumanidagi Oqtepasoy hamda Toshkent viloyatining Bo‘stonliq tumanidagi Oqsoqotasoy hududlarida zamonaviy gidrotexnik inshootlar qad rostlaydi.
Ushbu omborlarning ishga tushirilishi natijasida minglab gektar maydonlarning suv ta’minoti tubdan yaxshilanadi va qishloq xo‘jaligida foydalanilmayotgan yerlarni o‘zlashtirish imkoniyati kengayadi. Hisob-kitoblarga ko‘ra, yangi suv zaxiralari evaziga Samarqand viloyatida 7 ming gektar, Toshkent viloyatida 2 ming gektar va Jizzax viloyatida 300 gektar yerning suv ta’minoti barqarorlashadi.
Bundan tashqari, Samarqand va Toshkent viloyatlarida jami 3,6 ming gektardan ortiq yangi yer maydonlari qishloq xo‘jaligi oborotiga kiritiladi. Bu esa hududlarda oziq-ovqat xavfsizligini ta’minlash va mahsulot yetishtirish hajmini sezilarli darajada oshirishga xizmat qiladi.
Mutaxassislar tomonidan respublika bo‘ylab kichik suv omborlarini qurish mumkin bo‘lgan jami 60 ta istiqbolli maydon aniqlangan. Sel-suv omborlarining asosiy vazifasi nafaqat suv to‘plash, balki bahorgi sel va toshqinlarning salbiy oqibatlarini yumshatishdan iboratdir.
Ushbu suv manbalaridan oqilona foydalanish orqali qishloq joylarda yangi ish o‘rinlari yaratiladi va aholi daromadlari oshadi. Loyihalarni moliyalashtirishda davlat-xususiy sheriklik tamoyillariga alohida e’tibor qaratilmoqda.
Xususan, Jizzax va Toshkent viloyatlaridagi ayrim inshootlar qurilishiga xususiy investorlar jalb etiladi. Shuningdek, suv omborlari atrofida turizm maskanlari, dam olish zonalari va baliqchilik xo‘jaliklarini tashkil etishga ruxsat berilishi hududlarning iqtisodiy jozibadorligini yanada oshiradi.
Davlat tomonidan esa ushbu ob’ektlar uchun zarur bo‘lgan barcha muhandislik va kommunikatsiya tarmoqlari yetkazib berilishi kafolatlanadi.
