O‘zbekistonda IELTS imtihoni faqat kompyuterda bo‘ladi

O‘zbekistonda xalqaro til sertifikati bo‘lgan IELTS imtihonini qog‘oz shaklida topshirish imkoniyati bekor qilindi. Bu haqida Zamin.uz xabar berdi.

Endilikda ushbu imtihonni faqat kompyuter orqali topshirish mumkin bo‘ladi. Bu qaror imtihon jarayonida xavfsizlikni ta’minlash va ta’lim sohasida shaffoflikni oshirish maqsadida qabul qilindi.

So‘nggi paytlarda IELTS imtihon savollarining tarqalishi hamda noqonuniy yo‘llar bilan sertifikat olish holatlarining ko‘paygani sababli, imtihon natijalarining ishonchliligi xavf ostida qolayotgan edi. Bu esa xalqaro akkreditatsiya talablariga zid hisoblanadi.

IDP va British Council kabi rasmiy operatorlar ta’kidlaganidek, kompyuter asosidagi imtihonlar xavfsizlik va nazorat darajasi yuqori bo‘lib, natijalar tezroq e’lon qilinadi. Bu talabgorlarga imtihon jarayonini yanada samarali va shaffof o‘tkazish imkonini beradi.

Oldin qog‘oz shaklida ro‘yxatdan o‘tgan nomzodlarga ikki variant taklif etilmoqda: imtihon formasini kompyuter shakliga o‘zgartirish yoki to‘lovni to‘liq qaytarib olish. Ushbu imkoniyat nomzodlarga o‘z huquqlaridan erkin foydalanish va imtihonga tayyorgarlik jarayonini qayta rejalashtirish imkonini beradi.

Shunday qilib, IELTS imtihoni sifat va xavfsizlik talablariga yanada moslashadi.