O‘zbekiston va Daniya chorvachilikda hamkorlikni kuchaytirdi
O‘zbekiston Veterinariya va chorvachilikni rivojlantirish davlat qo‘mitasi delegatsiyasi Daniyada amaliy xizmat safari uyushtirdi. Bu haqida Zamin.uz xabar berdi.
Safar davomida delegatsiya a’zolari Daniya Qishloq xo‘jaligi va oziq-ovqat kengashi, IFU Daniya ta’sir fondi hamda boshqa yetakchi kompaniyalar vakillari bilan muhim muzokaralar o‘tkazdi. Yig‘ilishlarda veterinariya, chorvachilik, sertifikatsiya, kadrlar tayyorlash va tajriba almashish sohalarida kelgusidagi hamkorlik loyihalari muhokama qilindi.
Delegatsiya UNIBIO kompaniyasining Innovatsiya markazi va Viking Genetics korxonasi ishlab chiqarish maydonlarida bo‘lib, faoliyat bilan yaqindan tanishdi. UNIBIO rahbariyati bilan O‘zbekistonda bioprotein ozuqa qo‘shimchasini ishlab chiqarish bo‘yicha yangi loyiha ustida kelishuvga erishildi.
Viking Genetics veterinariya rahbari naslchilik sohasida tajriba almashish, seleksiya markazini tashkil etish hamda chorvador-fermerlar malakasini oshirish bo‘yicha qo‘shma loyihalarni amalga oshirish taklifini qo‘llab-quvvatladi. Shuningdek, Samarqand veterinariya, chorvachilik va biotexnologiyalar universiteti talabalari uchun Viking Genetics laboratoriyalarida qisqa muddatli o‘quv-amaliy mashg‘ulotlar tashkil etishga kelishildi.
Tomonlar ushbu hamkorlik natijasida O‘zbekistonda zamonaviy innovatsiyalarni joriy etish hamda soha mutaxassislarini xalqaro standartlar asosida tayyorlash yo‘lida yangi bosqichga o‘tishga kelishib oldi. Bu esa mamlakat chorvachilik va veterinariya sohasining rivojlanishiga katta hissa qo‘shadi.
