Jasorat maktablariga 5-sinfdan o‘quvchi qabul qilinadi
Mudofaa vazirligi hamda Maktabgacha va maktab ta’limi vazirligi tomonidan “Jasorat maktablari”ga o‘quvchilarni qabul qilish va o‘quv-tarbiyaviy jarayonlarni tashkil etish tartibini belgilovchi nizom tasdiqlandi. Bu haqida Zamin.uz xabar berdi.
“Jasorat maktablari” respublikaning har bir tuman yoki shahri hududida, umumta’lim o‘rta maktablari bazasida tashkil etiladi. Ularning asosiy maqsadi bolalarni yoshlikdan boshlab vatanga sadoqat ruhida tarbiyalash, jismonan sog‘lom va ma’naviy jihatdan yetuk shaxs sifatida voyaga yetkazishdir.
Jasorat sinflariga o‘quvchilar 5-sinfdan boshlab qabul qilinadi. Har bir sinfda 26 nafar o‘quvchi bo‘lishi mumkin.
Qabul imtihon natijalari asosida amalga oshiriladi. Sinovlarda matematika va ona tili fanlari bo‘yicha testlar hamda jismoniy tayyorgarlik tekshiruvi mavjud.
Jasorat sinflariga faqat O‘zbekiston fuqarolari qabul qilinadi. Ta’lim jarayonida umumiy o‘rta ta’lim fanlari soatlari maqbullashtiriladi va shu hisobga matematika, fizika, tarix, chet tili hamda chaqiruvga qadar boshlang‘ich tayyorgarlik fanlari chuqurlashtirilgan holda o‘tiladi.
Ta’lim 5-sinfdan 11-sinfgacha davom etadi va o‘zbek, qoraqalpoq yoki rus tillarida olib boriladi. Bu maktablar yosh avlodni vatanparvarlik ruhida tarbiyalash hamda ularning bilim va ko‘nikmalarini oshirishga xizmat qiladi.
