Mirziyoyev Fuzuliy shahrida yangi maktabni ochdi
Prezident Shavkat Mirziyoyev Ozarboyjonga davlat tashrifi doirasida Fuzuliy shahriga tashrif buyurdi. Bu haqida Zamin.uz xabar berdi.
Aeroportda oliy martabali mehmonni Ozarboyjon madaniyat vaziri Odil Kerimli hamda boshqa rasmiy shaxslar kutib oldi. Fuzuliy shahri buyuk Ozarboyjon shoiri va mutafakkiri Muhammad Fuzuliy nomi bilan atalgan.
Mamlakatning janubi-g‘arbiy qismida joylashgan bu shahar tarixan Qorabog‘ning janubiy darvozasi hisoblanadi. 2020 yildan boshlab Fuzuliy tumanida va shahrida keng ko‘lamli qayta tiklash ishlari amalga oshirilmoqda.
2021 yilda foydalanishga topshirilgan Fuzuliy aeroporti bu jarayondagi muhim infratuzilma obyektlaridan biri bo‘ldi. Shahar hududida zamonaviy turar joy majmualari, tibbiyot va ta’lim muassasalari, shuningdek, boshqa infratuzilma obyektlari barpo etildi va yangilari qurilmoqda.
2023 yil avgust oyida ikki mamlakat rahbarlari ishtirokida shaharda O‘zbekiston prezidenti tashabbusi bilan birodar xalqlar o‘rtasidagi mustahkam do‘stlik ramzi sifatida Mirzo Ulug‘bek nomidagi zamonaviy maktab ochildi. Bu voqea ikki tomonlama aloqalar va madaniy hamkorlikni yanada rivojlantirishga xizmat qiladi.
