Tibbiyotda 90 kunlik sifat va nazorat dasturi boshlandi
Joriy yilning 1 iyunidan O‘zbekistonda «Tibbiyotda 90 kunlik o‘zgarishlar vaqti» dasturi boshlandi. Bu haqida Zamin.uz xabar berdi.
Ushbu dastur doirasida tibbiyot muassasalarida bemorlar uchun qulay sharoitlar yaratish, ro‘yxatga olish va kutish joylarini yaxshilash, shuningdek, tibbiy xizmat sifatini oshirish maqsad qilingan. Shuningdek, shaxsiy gigiyena qoidalariga qat’iy rioya etilishi ta’minlanadi.
Dastur ijrosi sifatini nazorat qilish, mahalliy mutasaddilarning mas’uliyatini oshirish va budjet mablag‘laridan samarali foydalanishni ta’minlash uchun jamoatchilik nazorati juda muhimdir. Shu sababli, Sog‘liqni saqlash vazirligi barcha fuqarolarni bu jarayonga faol hamkorlik qilishga chaqiradi.
Hududlarda dastur doirasida korrupsiyaviy holatlar aniqlansa, Sog‘liqni saqlash vazirligining Korrupsiyaga qarshi ichki nazorat bo‘linmasiga (71) 241-10-65 raqami yoki respublika bo‘yicha yagona 1203 «Ishonch telefoni»ga, shuningdek, ssvantikor_bot telegram botiga murojaat qilish mumkin. Murojaatchining shaxsiy ma’lumotlari sir saqlanishi kafolatlanadi.
Sog‘liqni saqlash vazirligi korrupsiyaga qarshi murosasiz munosabatda bo‘lib, fuqarolarning barcha murojaatlari alohida e’tiborga olinadi. Fuqarolar o‘zaro hamkorlikda sog‘liqni saqlash tizimining yanada oshkoraligini ta’minlashga hissa qo‘shishlari so‘raladi.
