Boku shahrida bo‘lib o‘tgan muzokaralar yakunida O‘zbekiston prezidenti Shavkat Mirziyoyev va Ozarboyjon prezidenti Ilhom Aliyev Oliy davlatlararo kengashning ikkinchi yig‘ilishida muhim qarorlarni qabul qildilar. Bu haqida Zamin.uz xabar berdi.
Ushbu yig‘ilish doirasida ikki davlat rahbarlari huzurida bir qator ikki tomonlama hujjatlar imzolandi. Ular orasida 2025-2029 yillarda ittifoqchilik munosabatlarini amalga oshirish bo‘yicha yo‘l xaritasi, atrof-muhitni muhofaza qilish sohasida hamkorlik to‘g‘risidagi hukumatlararo bitim, shuningdek fan, kasb-hunar va oliy ta’lim sohalarida hamkorlik to‘g‘risidagi bitim mavjud.
Bundan tashqari, 2025-2026 yillarga mo‘ljallangan sanoat kooperatsiyasi dasturi, 2030 yilga qadar tovar ayirboshlash hajmini 1 milliard dollarga yetkazish dasturi ham qabul qilindi. Qishloq xo‘jaligi va oziq-ovqat ta’minoti sohasidagi hamkorlikni rivojlantirish, ijtimoiy himoya sohasida chora-tadbirlar rejasi hamda kemachilik va kemasozlik sohasida hamkorlik to‘g‘risida bayonnoma imzolandi.
Shuningdek, Toshkent viloyati va Sumg‘ayit shahri hamda Navoiy va Gabala shaharlari o‘rtasida birodarlik munosabatlarini o‘rnatish bo‘yicha kelishuvlar amalga oshirildi. Ushbu hujjatlar ikki davlat o‘rtasidagi hamkorlikni yanada mustahkamlash va rivojlantirishga xizmat qiladi.
