Pensiya xizmatlari 2027 yildan raqamlashtiriladi
Prezident tomonidan “Iqtisodiyot va moliya vazirligi huzuridagi G‘aznachilik xizmati qo‘mitasi hamda budjetdan tashqari Pensiya jamg‘armasi tomonidan zamonaviy xizmatlarni joriy etish chora-tadbirlari to‘g‘risida” farmon imzolandi. Bu haqida Zamin.uz xabar berdi.
Ushbu farmonga ko‘ra, 2027 yil 1 yanvardan boshlab Iqtisodiyot va moliya vazirligi huzuridagi G‘aznachilik xizmati qo‘mitasi hamda budjetdan tashqari pensiya jamg‘armasining tuman va shahar bo‘limlari faoliyati raqamlashtirish asosida tugatiladi. Shu bilan birga, G‘aznachilik qo‘mitasi hamda pensiya jamg‘armasining hududiy boshqarmalarida 1 dan 3 shtat birlikgacha bo‘lgan ixcham xizmat ko‘rsatish ofislari tashkil etiladi.
2026 yil 1 dekabrdan boshlab pensiya tizimida bir qator jarayonlar avtomatlashtiriladi. Fuqarolarning mavjud ish staji va ish haqlari haqidagi elektron ma’lumotlarga tayangan holda pensiya miqdorini oldindan aniqlash uchun “Mening pensiyam” nomli onlayn xizmat joriy etiladi.
Shuningdek, pensiya ta’minotiga oid barcha xizmatlar to‘liq proaktiv, elektron va interaktiv shaklda ko‘rsatiladi. Bundan tashqari, 2025 yil 1 oktyabrgacha fuqarolarning pensiya to‘lovlariga undirish qo‘llanishidan oldin ularni oldindan xabardor qilish tizimi yo‘lga qo‘yiladi.
Ushbu chora-tadbirlar pensiya xizmatlarini yanada qulay va shaffof qilishga qaratilgan.
