Yashash joyi bo‘yicha ro‘yxatga olish tartibi belgilandi
O‘zbekistonda fuqarolar, xorijliklar hamda fuqaroligi bo‘lmagan shaxslarni yashash va bo‘lish joyi bo‘yicha ro‘yxatdan o‘tkazish tartibi qonun bilan belgilandi. Bu haqida Zamin.uz xabar berdi.
Bu haqda Adliya vazirligi ma’lum qildi. Qonunga ko‘ra, agar kimdir boshqalarga yashash uchun uy yoki xonadon taqdim etsa, u yashovchilarni o‘z vaqtida ro‘yxatdan o‘tkazishi majburiydir.
Ushbu talab uy egasi yoki undan foydalanish huquqiga ega shaxslarga taalluqlidir. Shuningdek, vaqtincha yashovchilar, masalan, mehmonxona yoki xostelda qolayotganlar E-mehmon tizimi orqali ro‘yxatga olinadi.
Doimiy chet elda yashayotgan O‘zbekiston fuqarolari mamlakatga qaytgach, 10 ish kuni ichida ro‘yxatdan o‘tishlari shart. Yashash manzili bo‘yicha ro‘yxatdan o‘tish quyidagi joylarda amalga oshiriladi: Ichki ishlar vazirligi migratsiya va fuqarolikni rasmiylashtirish bo‘limlarida, davlat xizmatlari markazlarida hamda my.gov.uz portali orqali onlayn tartibda.
Ro‘yxatga olishda yashash maydoni bo‘yicha belgilangan ijtimoiy norma hisobga olinadi. Ushbu tartib fuqarolar huquqini himoya qilish va yashash joyini aniq belgilash maqsadida joriy etilgan.
