O‘zbekistonda Toshkent shahri va Toshkent viloyatidagi doimiy ro‘yxatdan o‘tish tizimi bekor qilindi. Bu haqida Zamin.uz xabar berdi.
Ushbu o‘zgarish haqida O‘zbekiston Respublikasi Prezidenti Administratsiyasi xabar berdi. Ma’lumotlarga ko‘ra, 2011 yilda qabul qilingan va poytaxt hamda unga tutash hududlarda doimiy propiskasiz yashashni cheklovchi qonun rasman bekor qilindi.
Yangi tartib 2025-yil 11-oktabrdan kuchga kiradi. Avvalgi qonunchilikka ko‘ra, boshqa viloyatlardan Toshkentga ko‘chib kelgan fuqarolar uy sotib olish, ishga joylashish va doimiy yashash uchun ko‘plab cheklovlarga duch kelar edi.
Bu holat ko‘pchilikni vaqtinchalik propiska olishga majbur qilardi. So‘nggi yillarda esa ayrim yengilliklar joriy etilgan, masalan, boshqa hudud aholisi Toshkentda uy sotib olish va ish topishga ruxsat olgan.
Endilikda esa ushbu barcha cheklovlar olib tashlandi. Bu qaror fuqarolarga poytaxt va viloyat hududlarida erkin yashash, ishlash va mulk huquqini amalga oshirish imkonini beradi.
Shu tariqa, Toshkent va uning atrofidagi hududlarda yashash tartibiga oid masalalar soddalashtiriladi va fuqarolarning huquqlari yanada kengaytiriladi. Bu o‘zgarishlar iqtisodiy faollikni oshirishga ham ijobiy ta’sir ko‘rsatadi.
