Oliy ta’limga qabul uchun test imtihonlari boshlandi
O‘zbekiston Respublikasida 2025/2026 o‘quv yili uchun oliy va kasbiy ta’lim muassasalariga qabul jarayoni doirasida test imtihonlari rasmiy ravishda boshlandi. Bu haqida Zamin.uz xabar berdi.
Test sinovlari har kuni ikki smenada tashkil etilmoqda. Birinchi smena soat 08:00 dan 11:00 gacha, ikkinchi smena esa soat 15:00 dan 18:00 gacha davom etadi.
Abituriyentlardan imtihon boshlanishidan kamida bir soat oldin test o‘tkaziladigan joyga kelishi talab qilinadi. Shuningdek, ular bilan pasport yoki ID-kartaning asl nusxasi hamda abituriyent ruxsatnomasi bo‘lishi shart.
Muhim eslatma sifatida, birinchi smena ishtirokchilari soat 07:30 gacha, ikkinchi smena qatnashchilari esa soat 14:30 gacha tekshiruvdan o‘tib, o‘z o‘rnini egallashi lozim. Abituriyentlardan belgilangan vaqtga qat’iy rioya qilish, barcha zarur hujjatlarni tayyor holda olib kelish so‘raladi.
Sinovlarning adolatli va muvaffaqiyatli o‘tishini ta’minlash maqsadida barcha shart-sharoitlar yaratilgan. Barcha yoshlarimizga imtihonlarda omad tilaymiz.
