2025/2026 yilda oliy ta’limga o‘tish ballari belgilandi
O‘zbekiston Respublikasi Oliy ta’lim, fan va innovatsiyalar vazirligi 2025/2026 o‘quv yili uchun xususiy va xorijiy oliy ta’lim muassasalaridan davlat oliy ta’lim muassasalariga o‘tish uchun talab qilinadigan minimal ballarni tasdiqladi. Bu haqida Zamin.uz xabar berdi.
Ushbu qaror bilan talabalarning o‘tish ballari aniq belgilandi. Eng yuqori o‘tish bali “Huquq” yo‘nalishida bo‘lib, davlat oliy ta’lim muassasasiga o‘tish uchun talabalar kamida 165 ball to‘plashlari kerak.
Bu ko‘rsatkich o‘tgan yilga nisbatan oshirildi, chunki avval minimal ball 140 edi. Eng past o‘tish ballari 60-70 atrofida bo‘lib, ular “Veterinariya” va “Qishloq, o‘rmon hamda baliqchilik xo‘jaligi” yo‘nalishlariga taalluqlidir.
Shuningdek, ijtimoiy fanlar va biznes yo‘nalishlariga o‘tish uchun kamida 105 ball yig‘ish talab etiladi. Ta’lim, tillar, atrof-muhit, matematika, statistika va ijtimoiy himoya sohalarida esa minimal ball 94 ga teng.
Tabiiy fanlar, jumladan fizika va biologiya yo‘nalishlari uchun esa kamida 80 ball talab qilinadi. Ushbu yangi ballar o‘quv yilida talabalar uchun tanlov jarayonini yanada sifatli va adolatli tashkil etishga xizmat qiladi.
Oliy ta’lim muassasalariga o‘tishda belgilangan minimal ballar talabalar malakasini oshirish va o‘qishga qabul jarayonini yaxshilash maqsadida ko‘rib chiqildi.
