O‘zbekistonda jazirama va issiq havo kutilmoqda

O‘zbekistonda 17-19 iyul kunlari janubdan issiq havo oqimlari kirishi kutilmoqda. Bu haqida Zamin.uz xabar berdi.

Bu davrda havo harorati ayrim hududlarda 40-45 darajagacha ko‘tarilishi mumkin. Sog‘liqni saqlash vazirligi bunday jazirama sharoitida aholini sog‘lig‘iga alohida eʼtibor berishga chaqirmoqda.

Jaziramada ayniqsa bolalar, keksalar, homilador ayollar hamda surunkali kasalliklardan aziyat chekayotganlar ehtiyotkor bo‘lishlari zarur. Issiq havo organizmning termoregulyatsiya tizimiga katta yuklama beradi, bu esa yurak-qon tomir kasalliklari, umumiy holsizlik va oftob urishi xavfini oshiradi.

Kun davomida soat 12:00 dan 16:00 gacha quyosh nurlari eng kuchli bo‘ladi, shuning uchun bu paytda yopiq va salqin joylarda bo‘lish tavsiya etiladi. Zarurat bo‘lsa, ko‘chaga soyabon va keng bosh kiyim bilan chiqish, quyoshdan himoyalovchi ko‘zoynak taqish lozim.

Kiyim tanlashda yengil, keng va tabiiy matolardan tikilgan, och rangli liboslarni afzal ko‘rish maqsadga muvofiqdir. Uyda esa derazalarni kunduzi yopiq holda saqlash, kechasi esa shamollatish, issiq chiqaruvchi maishiy texnikalardan foydalanishni cheklash tavsiya etiladi.

Kun davomida tana haroratini pasaytirish uchun salqin dush qabul qilish mumkin, ammo juda sovuq suvdan foydalanmaslik zarur. Jismoniy faollikni issiq havoda kamaytirish, sport mashg‘ulotlarini konditsionerli binolarda o‘tkazish maqsadga muvofiqdir.

Mashg‘ulot vaqtida tana holatini kuzatib, bosh aylanishi yoki holsizlik paydo bo‘lsa, darhol to‘xtash kerak. Surunkali kasalliklari bor odamlar issiq kunlarda shifokor bilan maslahatlashmasdan jismoniy faollikni oshirmasliklari zarur.

Bunday ehtiyot choralariga rioya qilish jazirama sharoitida sog‘likni saqlash va salomatlik muammolarining oldini olishga yordam beradi. Har bir fuqaro o‘z salomatligiga mas’uliyat bilan yondashishi lozim.