O‘zbekiston Tojikistondan elektr energiyasi sotib oladi
O‘zbekiston Tojikistondagi Rog‘un gidroelektrostansiyasi orqali elektr energiyasi xarid qilishni rejalashtirmoqda. Bu haqida Zamin.uz xabar berdi.
Tojikiston hukumati Toshkent bilan elektr ta’minoti bo‘yicha kelishuv loyihasini tasdiqladi. Ushbu hujjat matni Adliya vazirligi rasmiy saytida e’lon qilingan.
Elektr energiyasi uchun to‘lov “Uzenergosotish” kompaniyasi tomonidan amalga oshiriladi. 1 kilovatt-soat narxi qo‘shilgan qiymat solig‘i bilan birga 3,4 AQSh senti miqdorida belgilangan.
Ikkinchi yildan boshlab narx har yili 1 foizga oshib boradi. Shuningdek, Tojikistonning “Barki Tochik” energetika kompaniyasi O‘zbekistonga qo‘shimcha elektr energiyasi yetkazib berishni rejalashtirmoqda.
Toshkent va Dushanbe o‘rtasidagi bu kelishuv 20 yil davom etadi va keyinchalik 10 yillik muddatlarga uzaytirilishi mumkin. Nizo va kelishmovchiliklar muzokaralar hamda maslahatlar orqali hal etiladi.
Rog‘un GES Tojikistondagi eng yirik gidroelektrostansiya bo‘lib, Vaxsh daryosida qurilmoqda. Uning quvvati 3600 megavattga teng.
2018 yilda birinchi, 2019 yilda esa ikkinchi agregat ishga tushirilgan. 2024 yilda Tojikiston 2,7 milliard kilovatt-soat elektr energiyasini eksport qilgan, bu o‘tgan yilga nisbatan 7,8 foizga kamayish hisoblanadi.
Asosiy xaridorlar Afg‘oniston, O‘zbekiston va Qirg‘izistondir. O‘zbekiston o‘tgan yili elektr energiyasi uchun 18,4 million dollar to‘ladi.
