O‘zbekiston dunyoda eng xavfsiz 25 davlat qatorida
2025 yilning birinchi yarmida xalqaro ekspertlar tomonidan o‘tkazilgan tahlillar natijasida O‘zbekiston xavfsizlik bo‘yicha dunyoda eng xavfsiz 25 ta davlat qatoridan joy oldi. Bu haqida Zamin.uz xabar berdi.
Numbeo platformasi tomonidan tuzilgan global xavfsizlik reytingida yurtimiz 73,4 ball bilan 148 mamlakat orasida 25-o‘rinni egalladi. Ushbu reyting aholining shaxsiy fikrlari va kundalik tajribalariga asoslangan bo‘lib, rasmiy statistikalardan farq qiladi.
Reytingda ko‘chaga chiqishdagi xavfsizlik, jinoyatchilik darajasi, o‘g‘irlik, jismoniy hujumlar va zo‘ravonlik holatlari kabi ko‘rsatkichlar hisobga olingan. Xavfsizlik indeksi 0 dan 100 gacha baholanadi, bunda yuqori ball mamlakatda barqarorlik va tinchlik mavjudligini bildiradi.
O‘zbekistonning jinoyatchilik indeksi esa 26,6 ni tashkil etib, bu fuqarolarning o‘zini xotirjam his qilishini ko‘rsatadi. Qiziqarli jihati shundaki, O‘zbekiston ko‘plab rivojlangan davlatlardan, jumladan Yaponiya, Fransiya va Germaniyadan yuqori natija ko‘rsatdi.
Markaziy Osiyo davlatlari ichida ham yurtimiz yetakchilik qilmoqda. Masalan, Qozog‘iston 73-o‘rin va 54,4 ball bilan, Qirg‘iziston esa 101-o‘rin va 48 ball bilan reytingda ishtirok etdi.
Bu ko‘rsatkichlar O‘zbekiston xavfsizlik sohasida mintaqaviy yetakchi ekanligini tasdiqlaydi. Reyting yuqori pog‘onalarida Birlashgan Arab Amirliklari, Andorra va Qatar kabi davlatlar joylashgan bo‘lib, ular xavfsizlik siyosatida qat’iy choralar ko‘rgan.
Eng past o‘rinlarda esa Gaiti, Papua-Yangi Gvineya va Venesuela kabi siyosiy va ijtimoiy beqaror mamlakatlar joy olgan. Bu davlatlarda jinoyatchilik darajasi yuqori bo‘lib, aholi va sayyohlar uchun xavf saqlanmoqda.
Mutasaddilar ushbu yutuqni so‘nggi yillarda huquq-tartibot idoralari faoliyatini takomillashtirish, profilaktik tadbirlarni kuchaytirish va jamoatchilik nazoratini oshirish bilan bog‘lamoqda. Bundan tashqari, yuqori xavfsizlik indeksi turizm, sarmoya va xalqaro nufuzni oshirishda muhim omil hisoblanadi.
O‘zbekiston aholisi ko‘chada bemalol yurishi, kechasi hordiq chiqarishi va bolalarni erkin maktabga yuborishi mumkinligi mamlakatdagi tinchlik va xavfsizlik darajasini ko‘rsatadi. Shu sababli, yurtimiz aholisining o‘zini nisbatan xotirjam va osoyishta his qilayotgani haqida xulosa chiqarish mumkin.
