Rossiyalik yarim himoyachi Anton Miranchuk Premyer-ligaga qaytmoqda. Bu haqida Euro-football.ru xabar berdi.
Sport-Express jurnalistlarining xabar berishicha, 29 yoshli futbolchining yangi jamoasi Moskva shahridagi Dinamo klubi bo‘ladi. Oq-ko‘k jamoa shveytsariyaliklar bilan muvaffaqiyatli muzokaralar olib bordi va yarim himoyachining transferini 1,7 million yevroga kelishib oldi.
Miranchuk poytaxtning Lokomotiv klubida tarbiyalangan. U o‘tgan yilning kuzida Shveytsariya chempionatiga ko‘chib o‘tgan.
Sion jamoasi tarkibida rossiyalik futbolchi 25 ta o‘yinda maydonga tushdi, ularda ikki marta gol urdi va uchta golli uzatma berdi. Rossiya Premyer-ligasining beshta turidan so‘ng, Dinamo jamoasi 12-o‘rinda turibdi.
