Randal Kolo-Muani Angliya Premer Ligasi klubida
Hujumchi Randal Kolo-Muani Angliya Premer Ligasi jamoalaridan birida faoliyatini davom ettiradi. Bu haqida Euro-football.ru xabar berdi.
The Athletic nashrining ma’lumotlariga ko‘ra, «Tottenhem» klubi «PSJ» bilan Kolo-Muanini 2025/2026 yilgi mavsum oxirigacha ijaraga olish bo‘yicha kelishuvga erishdi. 26 yoshli futbolchi hozirda Londonga tibbiy ko‘rikdan o‘tish uchun yo‘l olmoqda.
Fransuz futbolchisi bilan shartnoma shartlari allaqachon kelishib olingan. Manba ta’kidicha, «PSJ» va «Tottenhem» o‘rtasidagi ijara kelishuvida Kolo-Muanini sotib olish huquqi bo‘yicha hech qanday band mavjud emas.
Ya’ni, ijaraga berish shartnomasida futbolchini keyinchalik doimiy sotib olish imkoniyati ko‘zda tutilmagan. Shuningdek, eslatib o‘tamiz, o‘tgan mavsumning ikkinchi yarmida Kolo-Muani vaqtinchalik «Yuventus» jamoasida o‘ynagan.
Bu transfer uning faoliyatida yangi bosqich bo‘lib, hozir esa Angliya chempionatida o‘z o‘rnini mustahkamlashga intilmoqda.
