Gvardiola Niko O‘Raylining o‘yinini yuqori baholadi

Manchester City jamoasi bosh murabbiyi Xosep Gvardiola Chempionlar ligasida Napoli jamoasiga qarshi o‘yinda maydonga tushgan Niko O’Raylining chiqishini yuqori baholadi. Bu haqda Euro-football.ru xabar berdi.

Yigirma yoshli futbolchi asosiy tarkibda maydonga tushib, o‘zining odatdagi pozitsiyasidan farqli ravishda chap himoyachi sifatida butun o‘yinni to‘liq o‘tkazdi. Manchester City jamoasi Italiyaning chempioni Napoli ustidan 2:0 hisobida g‘alaba qozondi.

Gvardiola fikricha, O’Rayli juda yuqori darajadagi futbolchi hisoblanadi. U bir nechta pozitsiyada o‘ynay oladi, standart vaziyatlarda yaxshi harakat qiladi, raqib bilan yuzma-yuz vaziyatlarda o‘zini ishonchli tutadi va to‘p bilan ajoyib ishlay oladi.

Murabbiy yosh futbolchining jamoada uzoq yillar faoliyat ko‘rsatishiga umid bildirdi. Niko O’Raylining Manchester City bilan amaldagi shartnomasi 2028 yil o‘rtalarigacha mo‘ljallangan.

Hozirgacha u jamoaning asosiy tarkibida 25 ta o‘yin o‘tkazgan.