Bellingem jarrohlik amaliyotidan so‘ng maydonga qaytdi

Madridning «Real» jamoasining yarim himoyachisi Jud Bellingem joriy mavsumda ilk bor maydonga tushdi. Bu haqda Euro-football.ru xabar berdi.

Angliyalik futbolchi La Liga doirasidagi shanba kuni bo‘lib o‘tgan «Espanyol»ga qarshi o‘yinda 89-daqiqada Kilian Mbappening o‘rniga maydonga kirdi. U maydonga tushgan paytda hisob 2:0 «Real» foydasiga bo‘lib, o‘yinning yakuniy natijasi allaqachon belgilangandi.

Eslatib o‘tamiz, 22 yoshli futbolchi yelkasidagi jarrohlikdan keyin tiklanish jarayonida bo‘lib, shu sababli mavsum boshlanishida maydonga tusha olmagan edi. Bellingem o‘zining Instagramdagi murojaatida muxlislarga minnatdorlik bildirdi.

U «Sizlarni va o‘yinni juda sog‘indim. Bugun stadionda ko‘rsatgan iliq qabulingiz uchun chuqur minnatdorman.

Tiklanish jarayonida ko‘rsatgan qo‘llab-quvvatlashingiz menga katta kuch berdi. Hala Madrid», dedi, deb xabar beradi jurnalist Fabrizio Romano.

Shuningdek, 23-sentabr, seshanba kuni Xavi Alonso boshchiligidagi jamoa safarda «Levante»ga qarshi o‘yin o‘tkazadi.