Xabi Alonso "Real Madrid"ning mag‘lubiyati sababini aytdi

«Real» joriy mavsumda birinchi marta mag‘lubiyatga uchradi. Bu haqda Euro-football.ru xabar berdi.

Shanba kuni Madrid derbisida «slivochniylar» «Atletiko»ga 2:5 hisobida yutqazdi. O‘yindan so‘ng jamoa bosh murabbiyi Xabi Alonso fikr bildirdi.

Uning so‘zlariga ko‘ra, bu og‘ir mag‘lubiyat bo‘ldi, biroq bunday jarayonlar bo‘lishi mumkin. Jamoa bu voqeadan saboq oladi, yuz bergan holatlarni tahlil qiladi va xulosalar chiqaradi.

Alonso ta’kidlashicha, bu o‘yinni unutmaydilar. Bugungi o‘yinda jamoa yetarlicha kurashmadi va «Real» darajasiga yeta olmadi.

Ikkinchi bo‘limda boshqacha o‘ynash kerak edi. Jamoa o‘z darajasida bo‘lmadi, maydonda kurashmadi, to‘pni olishda qiynaldi va o‘yin sur’ati yetishmadi.

Bu mavsumdagi birinchi mag‘lubiyat ekanini aytgan murabbiy, mag‘lubiyat achchiq bo‘lsa-da, mavsum endigina boshlandi, deb ta’kidladi. Ular xulosalar chiqarib, o‘z ustida ishlashlari zarurligini bildirdi.

Keyingi o‘yin 30 sentyabrda bo‘lib, «Real» Chempionlar ligasida «Kayrat»ga qarshi safarda maydonga tushadi.