Husanovning jasorati va jarohati futbol olamini hayratda qoldirdi
Angliya Premer-ligasining 25-turidan o‘rin olgan “Liverpul” va “Manchester Siti” o‘rtasidagi o‘yinda 21 yoshli o‘zbekistonlik markaziy himoyachi Abduqodir Husanovning ishtiroki keng muhokamalarga sabab bo‘ldi. Bu haqda Zamin.uz xabar berdi.
Ayniqsa, uchrashuvning 60-daqiqasidagi epizod futbol jamoatchiligi orasida katta e’tibor qozondi. O‘yinda Husanov himoyadagi ishonchli harakatlari bilan ajralib turdi.
U raqiblarning xavfli hujumlarini muvaffaqiyatli to‘xtatib, “Siti” darvozasi tomon yo‘l topishni qiyinlashtirdi. Muhammad Saloh, Kodi Gakpo kabi tajribali hujumchilar Husanovning kuchli himoya chizig‘idan o‘ta olmadilar.
The Sun nashri ham Husanovning o‘yinini yuqori baholab, uni “Khus control” deb atadi, ya’ni u vaziyatlarni nazorat qilishda ustun ekanini ta’kidladi. 60-daqiqada yuz bergan voqea esa o‘yinning eng keskin lahzasi bo‘ldi.
Gakponing hujumini to‘xtatishga urinayotgan Husanov ikki o‘yinchi orasida qolib ketdi. Natijada, raqib hujumchisi unga urilib ketdi, darvozabon esa tasodifan tizzasi bilan Husanovning yuziga zarba berdi.
Bu holat futbolchiga jiddiy jarohat yetkazdi va tibbiyot xodimlari darhol maydonga chiqishga majbur bo‘ldi. Shunga qaramay, Husanov bosh murabbiy Xosep Gvardiolaga o‘yinni davom ettirishga tayyorligini bildirdi.
Biroq tibbiyot guruhi futbolchining salomatligini birinchi o‘ringa qo‘yib, unga maydonga qaytishga ruxsat bermadi. Taniqli jurnalist Jeronimo Morgans o‘z fikrida Husanovning matonatini alohida ta’kidladi.
U yosh himoyachining jarohatga qaramay, jamoasiga yordam berishga intilganini yuqori baholab, uni “jangchi” deb atadi. Hozircha Husanovning salomatligi bo‘yicha rasmiy ma’lumot berilmagan.
Ammo bir nechta manbalarning xabar berishicha, uning ahvoli yaxshi va u yaqin oradagi o‘yinlarda maydonga qaytishi mumkin. Husanovning jasorati va maydondagi o‘yini nafaqat O‘zbekiston, balki Yevropa futbol jamoatchiligi e’tiborini ham qozondi.
Eng muhimi, uning salomatligi joyida bo‘lib, yana maydonga qaytishini barcha intiqlik bilan kutmoqda.
