Panenka: «Panenka» zarbasi hurmatsizlik emas, mahoratdir
Chex futboli afsonasi Antonin Panenka o‘zining mashhur «panenka» uslubida tepilgan penalti zarbasi haqida fikr bildirdi. Bu haqda Zamin.uz xabar berdi.
U bu zarbani raqibni mensimaslik yoki kamsitish deb hisoblamasligini ta’kidladi. Panenka ilk bor ushbu uslubni 1976-yilgi Yevropa chempionati finalida qo‘llagan va bu orqali futbol tarixida o‘z o‘rnini mustahkamlagan.
Bu haqda euro-football.ru xabar berdi. Panenka o‘z intervyusida bunday ijro hazil yoki hurmatsizlik emasligini, aksincha, gol urishning eng samarali usuli sifatida tanlanganini aytdi.
Uning so‘zlariga ko‘ra, Yevropa chempionati finalida o‘yinchining asosiy maqsadi faqat gol urish bo‘ladi, raqib ustidan kulish yoki kamsitish esa aslo xayolga kelmaydi. «Men futbolni sevaman va hech qachon raqibni mensimaslik niyatida bo‘lmaganman.
O‘sha vaziyatda bu gol urishning eng yaxshi usuli edi», — dedi Panenka Cadena SER radiosining El Larguero dasturida. Eslatib o‘tamiz, Panenka yaqinda Braim Diasning Afrika millatlar kubogi finalida «panenka» uslubida gol ura olmagani haqida ham izoh bergan edi.
Uning fikricha, bunday zarba muvaffaqiyatli chiqishi uchun o‘yinchi o‘zida to‘liq ishonch va mahoratni jamlashi kerak.
