Abduqodir Husanov: Premer-ligadagi ilk o‘zbekistonlik futbolchi
BBC nashri "Manchester Siti" klubi safida to‘p surayotgan o‘zbekistonlik futbolchi Abduqodir Husanovga bag‘ishlangan maqola chop etdi. Bu haqda Zamin.uz xabar berdi.
Unda yosh himoyachining faoliyatidagi qiziqarli jihatlar, debyutdagi qiyinchiliklari va zamonaviy futbol talablariga mos uslubi haqida so‘z yuritilgan. Husanov qisqa vaqt ichida o‘zini futbol olamida tanitib, yuqori saviyadagi o‘yinchi sifatida e’tirof qilingan.
Abduqodir Husanov Angliya Premer-ligasida maydonga tushgan ilk o‘zbekistonlik futbolchi sifatida tarixga kirdi. U 2025 yil yanvar oyida “Chelsi”ga qarshi o‘yinda “Manchester Siti” safida debyut qilgan.
Ammo bu o‘yin Husanov uchun oson kechmadi. U dastlabki daqiqalardayoq bir necha xatoga yo‘l qo‘yib, raqibning gol urishiga sababchi bo‘lgan va sariq kartochka olgan.
Bu og‘ir start futbolchi uchun katta sinov bo‘ldi. Gari Nevill va Pol Robinson kabi futbol mutaxassislari uning debyutini keskin tanqid qilgan.
Ammo Husanov bu bosimlarga chidab, o‘zini tiklay oldi. BBC maqolasida ta’kidlanishicha, Husanov hozir “Siti” himoyasining muhim bo‘g‘inlaridan biriga aylangan.
Uning yuqori tezligi va aql bilan o‘ynash qobiliyati murabbiy Pep Gvardiola tomonidan ham yuqori baholangan. Yosh himoyachi soatiga 35 km tezlikka chiqishi bilan Premer-ligadagi eng tezkor himoyachilardan biri sifatida qayd etilgan.
Bu esa zamonaviy futbol talablariga mos keladigan muhim xususiyatdir. Husanov joriy mavsumda barcha musobaqalarda 22 marta maydonga tushib, “Liverpul”, “Manchester Yunayted” va “Nyukasl” kabi kuchli jamoalarga qarshi o‘yinlarda ishonchli harakat qilgan.
Shuningdek, u to‘pni olib qo‘yish va to‘sib qolish ko‘rsatkichlari bo‘yicha klubda yetakchi o‘yinchilardan biri hisoblanadi. Maqolada Husanovning xarakteri va o‘sish sur’ati ham alohida ta’kidlangan.
BBC yozishicha, u kamgap va ortiqcha bezaksiz o‘yin ko‘rsatadi, ammo o‘z vazifasini aniq va ishonchli bajaradi. Gvardiolaning so‘zlariga ko‘ra, Husanov jismoniy kuch va tezkor fikrlash qobiliyatini birlashtirgan futbolchi bo‘lib, bu uning kelajakda yanada rivojlanishiga yordam beradi.
Yosh himoyachi nafaqat klubda, balki O‘zbekiston milliy terma jamoasida ham asosiy o‘yinchilardan biriga aylanishi kutilmoqda. BBC qayd etishicha, Husanov 2026 yilgi Jahon chempionatida O‘zbekiston sharafini himoya qilishi mumkin.
Bu esa uning xalqaro maydondagi mavqeini yanada mustahkamlashiga turtki bo‘ladi. Xulosa qilib aytganda, Abduqodir Husanov qisqa vaqt ichida o‘z ustida ishlash va qiyinchiliklarni yengib o‘tish orqali katta yutuqlarga erishdi.
Uning muvaffaqiyatlari nafaqat Angliya futbolida, balki O‘zbekiston futbolida ham yangi sahifa ochmoqda. Endi yosh himoyachining oldidagi asosiy vazifa — o‘z o‘rnini mustahkamlash va yanada yuqori cho‘qqilarni zabt etish.
