Messi jarohati sabab Puerto-Rikodagi o‘yin qoldirildi

AQShning "Inter Mayami" futbol klubi rasmiy sayti orqali Puerto-Rikoda bo‘lib o‘tishi rejalashtirilgan o‘rtoqlik uchrashuvi boshqa sanaga ko‘chirilganini e’lon qildi. Bu haqda Zamin.uz xabar berdi.

Ma’lum qilinishicha, bu qaror jamoa sardori Lionel Messining jarohati sabab qabul qilingan. Klub vakillarining ta’kidlashicha, 38 yoshli futbolchi so‘nggi o‘yindan so‘ng mushaklarida noqulaylik sezgan.

Shu sababli u Puerto-Rikodagi uchrashuvda ishtirok eta olmaydi. Messi ushbu holat yuzasidan Puerto-Riko muxlislaridan uzr so‘radi va quyidagicha izoh berdi: — Afsuski, so‘nggi o‘yinda mushaklarimda noqulaylik his qildim.

Puerto-Rikoda muxlislar bilan uchrashishni juda xohlardim. Shu bois klub bilan birgalikda o‘yinni boshqa sanaga ko‘chirishga qaror qildik.

Sizlarning o‘yinga bo‘lgan qiziqishingiz va bizni jonli tomosha qilish istagingizni juda yaxshi tushunaman. Umid qilamanki, bu orzu tez orada amalga oshadi, — dedi Messi.

Messining ushbu murojaati ijtimoiy tarmoqlarda tez tarqaldi va muxlislar tomonidan iliq kutib olindi. Ko‘pchilik futbolchining samimiyligi va muxlislariga bo‘lgan hurmatini yuqori baholadi.

Manba: One.uz