Pochettino: Messi doimiy pressing uslubida o‘ynamagan

PSJning sobiq bosh murabbiyi Maurisio Pochettino Parijda ishlagan davrini eslar ekan, yulduz futbolchilar bilan ishlashning o‘ziga xos qiyinchiliklari borligini ta’kidladi. Bu haqda Zamin.uz xabar berdi.

Argentinalik mutaxassis boshchiligida hujum chizig‘ida Lionel Messi, Neymar va Kilian Mbappe kabi futbolchilar harakat qilgan edi. Bu haqda euro-football.ru xabar beradi.

Pochettinoning so‘zlariga ko‘ra, bunday darajadagi futbolchilar ba’zan o‘zlari o‘ynayotgan klubdan ham kattaroq ta’sir kuchiga ega bo‘lishadi. U, xususan, Lionel Messidan doimiy pressing kutish noto‘g‘ri ekanini aytib o‘tdi.

Uning fikricha, Messi faol pressing uslubida hech qachon o‘ynamagan, hatto Pep Gvardiola boshchiligidagi eng yaxshi yillarida ham bu uning o‘yin uslubiga xos bo‘lmagan. Shuningdek, murabbiy ta’kidlaganidek, agar jamoa yaxshi natija ko‘rsatmasa, tanqidlar ko‘pincha murabbiyga qaratiladi.

Bugungi kunda Maurisio Pochettino AQSH terma jamoasini jahon chempionatiga tayyorlash bilan shug‘ullanmoqda. Shu bilan birga, ommaviy axborot vositalarida uning yozda “Tottenhem” klubiga qaytishi mumkinligi haqida mish-mishlar tarqalgan.