Ronaldu Yevropaga qaytishi mumkinligi muhokamada
Krishtianu Ronaldu Saudiya Arabistonining "Al-Nasr" klubi bilan bir muddat kelishmovchiliklar tufayli maydonga tushmagan edi. Bu haqda Zamin.uz xabar berdi.
Ammo hozirda u yana jamoa safida o‘ynashni boshladi. Shunga qaramay, portugaliyalik futbolchining yozgi transfer oynasida klubini o‘zgartirishi mumkinligi haqida xabarlar tarqalmoqda.
Bu haqda euro-football.ru sayti ma’lumot berdi. Ma’lum bo‘lishicha, futbolchining agenti Jorje Mendesh Yevropaning bir qator yetakchi klublariga murojaat qilib, 41 yoshli Ronalduni tarkibga qo‘shishni taklif qilmoqda.
Eslatib o‘tamiz, avvalroq ommaviy axborot vositalarida Ronaldu va Mendes o‘rtasida hamkorlik uzilgani haqida xabarlar chiqqandi. Biroq Transfermarkt saytidagi ma’lumotlarga ko‘ra, Krishtianu hanuz Mendesh agentligi mijozlari qatorida qayd etilgan.
Hozirgi shartnomaga muvofiq, Ronaldu "Al-Nasr" bilan 2027 yilning o‘rtalarigacha shartnoma imzolagan. Shunday bo‘lsa-da, uning Yevropaning top klublariga qaytishi ehtimoli futbol olamida katta qiziqish uyg‘otmoqda.
