Ikardi «Galatasaray» tarixida yangi rekord o‘rnatdi

Turkiya Superligasining 22-turida «Galatasaray» jamoasi «Eyupspor»ni yirik hisobda mag‘lub etdi — 5:1. Bu haqda Zamin.uz xabar berdi.

Ushbu o‘yinda argentinalik hujumchi Mauro Ikardi xet-trik qayd etib, jamoasi g‘alabasiga katta hissa qo‘shdi. Bu haqda euro-football.ru xabar beradi.

Mazkur uchrashuvda kiritilgan uchta gol Mauro Ikardiga «Galatasaray» tarixida yangi rekord o‘rnatish imkonini berdi. U klub tarixidagi eng sermahsul legioner futbolchiga aylandi.

Ikardi bu borada ruminiyalik afsonaviy futbolchi Georgi Hadjini ortda qoldirdi. Hadji o‘z faoliyati davomida «Galatasaray» safida 75 ta gol urgan bo‘lsa, Mauro Ikardi ushbu ko‘rsatkichni 76 taga yetkazdi.

Bundan tashqari, Ikardi klubning umumiy to‘purarlar ro‘yxatida ham yuqori o‘ringa ko‘tarilib, yettinchi pog‘onani egallab turibdi. Ma’lumotlarga ko‘ra, Mauro Ikardi 2023 yildan beri «Galatasaray»da faoliyat yuritmoqda.

U bunga qadar Fransiyaning «PSJ» klubi tarkibida o‘ynagan.