Ronaldu "Arkadag"ga qarshi o‘yinda maydonga tushmaydi
"Al-Nasr" jamoasi bosh murabbiyi Jorje Jezush Krishtianu Ronaldu yaqinlashib kelayotgan o‘yinda maydonga tushmasligi sabablarini tushuntirdi. Bu haqda Zamin.uz xabar berdi.
Bu haqda *euro-football.ru* nashri xabar berdi. Ar-Riyod klubi chorshanba kuni OFK Chempionlar ligasi doirasida Turkmanistonning "Arkadag" jamoasiga qarshi o‘yin o‘tkazadi.
Portugaliyalik yulduz hujumchi Krishtianu Ronalduning tez orada maydonga qaytishi kutilayotgan bo‘lsa-da, u bu safar ham jamoa tarkibiga kiritilmadi. Jorje Jezushning so‘zlariga ko‘ra, murabbiylar shtabi tig‘iz o‘yinlar jadvalini inobatga olib, Ronaldu va asosiy tarkibdagi yana bir nechta futbolchiga dam berishga qaror qilgan.
Ularning fikricha, bu qaror jamoaning kelgusi uchrashuvlar uchun yaxshi tayyorgarlik ko‘rishiga yordam beradi. Ayniqsa, Saudiya Pro Ligasi doirasidagi muhim "Al-Fateh"ga qarshi o‘yin oldidan futbolchilarning tiklanishi muhim ahamiyatga ega.
Shuningdek, Jezush Krishtianu Ronaldu uchun dam olish odatiy hol ekanini ta’kidladi. Unga ko‘ra, Ronaldu Saudiya Arabistonidan tashqarida o‘tadigan o‘yinlarda qatnashmasligi ilk marta kuzatilayotgani yo‘q.
Eslatib o‘tamiz, Saudiya chempionati doirasida "Al-Fateh" va "Al-Nasr" uchrashuvi shanba, 14-fevral kuni bo‘lib o‘tishi rejalashtirilgan.
