Ronaldu yozda Yevropaga qaytishi mumkin

Krishtianu Ronaldu yaqinda "Al-Nasr" klubi bilan bo‘lgan muammolarni hal qilib, yana maydonga qaytdi. Bu haqda Zamin.uz xabar berdi.

Shunga qaramay, yozgi transfer oynasida portugaliyalik afsonaning jamoasini o‘zgartirishi mumkinligi haqida xabarlar tarqalmoqda. Bu haqda *euro-football.ru* sayti ma’lumot berdi.

Manbalarga ko‘ra, Ronalduning agenti Jorje Mendes yozgi transferlar davriga tayyorgarlik ko‘rayotgan bir paytda Yevropaning bir necha top klublari bilan bog‘lanib, 41 yoshli futbolchini o‘z tarkiblariga qo‘shish taklifini ilgari surmoqda. Shu bilan birga, avvalroq ommaviy axborot vositalarida Ronaldu "Manchester Yunayted"ni tark etganidan keyin Mendes bilan hamkorlikni to‘xtatgani haqida xabarlar chiqqandi.

Biroq Transfermarkt ma’lumotlariga ko‘ra, Krishtianu hali ham Mendes agentligi mijozlaridan biri sifatida ro‘yxatga olingan. Eslatib o‘tamiz, Ronaldu va "Al-Nasr" o‘rtasidagi amaldagi shartnoma 2027 yilning o‘rtalarigacha davom etadi.

Shu sababli, uning kelajakdagi transferi borasida rasmiy ma’lumotlar hali tasdiqlanmagan. Yevropaning top klublari Ronalduni o‘z safiga qo‘shish istagini bildirsa-da, bu borada aniq qarorlar hali qabul qilinmagan.