Ronaldu Yevropaga qaytishi mumkinligi muhokama qilinmoqda

Krishtianu Ronaldu Saudiya Arabistonining "Al-Nasr" klubi bilan yuzaga kelgan kelishmovchiliklarni hal qilib, yana maydonga qaytdi. Bu haqda Zamin.uz xabar berdi.

Shunga qaramay, yozgi transferlar davrida portugaliyalik futbolchining boshqa klubga o‘tishi ehtimoli mavjud. Bu haqda euro-football.ru ma’lumot bermoqda.

Manbalarga ko‘ra, Krishtianuning agenti Jorje Mendes allaqachon Yevropaning eng kuchli klublari bilan muzokaralar olib bormoqda. U 41 yoshli futbolchini yozgi transferlar davrida jamoalarga taklif qilayotganini aytmoqda.

Avvalroq ommaviy axborot vositalarida Ronaldu "Manchester Yunayted"ni tark etganidan keyin Mendes bilan hamkorlikni to‘xtatgani haqida xabarlar tarqalgan edi. Ammo Transfermarkt ma’lumotlariga ko‘ra, futbolchi hali ham Mendes agentligining mijozlari qatorida.

Eslatib o‘tamiz, Krishtianu Ronaldu va "Al-Nasr" o‘rtasidagi amaldagi shartnoma 2027 yilning o‘rtalarigacha davom etadi. Shu sababli uning Yevropaga qaytishi uchun kelishuv talab etiladi.

Bu masala hozircha ochiq qolmoqda.