Bastoni "Yuventus"ga qarshi o‘yindagi xatosini tan oldi
"Inter" futbol klubi himoyachisi Alessandro Bastoni Italiya A Seriyasi doirasida "Yuventus"ga qarshi o‘yinda qilgan xatosini tan oldi. Bu haqda Zamin.uz xabar berdi.
Uchrashuvning 42-daqiqasida Bastoni bilan to‘qnashuvdan so‘ng "Yuventus" futbolchisi Pyer Kalyulyu ikkinchi sariq kartochka olib, maydonni tark etdi. Ushbu vaziyat ko‘plab muxlislar va ommaviy axborot vositalarida keskin muhokamalarga sabab bo‘ldi.
Ayrimlar Bastonining o‘zini tutishini qoralab, hattoki uni Italiya terma jamoasi tarkibidan chiqarish kerakligini ham ta’kidlashdi. Bu haqda "Sky Sport" va euro-football.ru xabar beradi.
Bastoni ushbu holat yuzasidan bayonot berib, o‘z xatosini tan oldi: "O‘sha kuni bo‘lgan voqea haqida juda ko‘p gapirildi. Men kontaktni his qildim, lekin mening reaksiyam haddan tashqari oshirib yuborilganini ko‘ryapman.
Eng ko‘p hafsalani pir qilgani — chetlatishdan so‘ng o‘zimni qanday tutganim. Har bir inson xato qilishi mumkin, lekin bu xatoni tan olish ham muhim", — dedi u.
Shuningdek, Italiya hakamlar qo‘mitasi ushbu vaziyatda bosh hakam noto‘g‘ri qaror chiqarganini tan oldi. Shunga qaramay, Kalyulyu kelgusi o‘yinni o‘tkazib yuboradigan bo‘ldi.
Bu holat futbol jamoatchiligi orasida hakamlar faoliyatiga bo‘lgan e’tiborni yanada oshirdi.
