Ronaldu "Arkadag"ga qarshi o‘yinda qatnashmaydi
"Al-Nasr" futbol klubi bosh murabbiyi Jorje Jezush Krishtianu Ronalduning navbatdagi o‘yinda qatnashmasligi haqida izoh berdi. Bu haqda Zamin.uz xabar berdi.
Bu haqda euro-football.ru xabar bermoqda. Ma’lum bo‘lishicha, chorshanba kuni Saudiya Arabistonining "Al-Nasr" klubi Osiyo Chempionlar Ligasi doirasida Turkmanistonning "Arkadag" jamoasiga qarshi maydonga tushadi.
Biroq portugaliyalik tajribali hujumchi Krishtianu Ronaldu bu o‘yinda ishtirok etmaydi. Murabbiy Ronalduning o‘yinda qatnashmasligi sababi sifatida jamoaning zich taqvimini ko‘rsatdi.
Unga ko‘ra, asosiy tarkibdagi bir nechta o‘yinchilar, jumladan, Ronaldu ham, qisqa muddatlik dam oladi. Jezushning so‘zlariga ko‘ra, bu qaror jamoaning keyingi muhim uchrashuvlari uchun futbolchilarning jismoniy tayyorgarligini saqlab qolish maqsadida qabul qilingan.
Murabbiy, shuningdek, Ronalduning bu kabi dam olishi birinchi marta sodir bo‘lmayotganini ta’kidladi. U avval ham Saudiya Arabistonidan tashqarida bo‘lib o‘tgan ayrim o‘yinlarda qatnashmagan.
Eslatib o‘tamiz, Saudiya Arabistoni chempionatidagi navbatdagi "Al-Fateh" va "Al-Nasr" jamoalari o‘rtasidagi o‘yin 14-fevral kuni bo‘lib o‘tadi.
