Ronaldu Yevropaga qaytishi mumkinmi?
Krishtianu Ronaldu yaqinda Saudiya Arabistonining "Al-Nasr" klubi bilan munosabatlarini tiklab, jamoa safida yana o‘yinlarga qaytdi. Bu haqda Zamin.uz xabar berdi.
Shunga qaramay, uning kelajakda boshqa klubga o‘tishi ehtimoli hali ham mavjud. Bu haqda *euro-football.ru* xabar berdi.
Ma’lum qilinishicha, Ronalduning agenti Jorje Mendesh Yevropaning eng kuchli klublari bilan aloqaga chiqib, yozgi transfer oynasida 41 yoshli futbolchini o‘z safiga qo‘shib olish imkoniyatlarini muhokama qilmoqda. Bu esa portugaliyalik yulduzning yana Yevropa maydonlariga qaytishi mumkinligini anglatadi.
Avvalroq ba’zi ommaviy axborot vositalarida Ronaldu va Mendeshning o‘zaro munosabatlari uzilgani haqida xabarlar tarqalgan edi. Biroq Transfermarkt ma’lumotlariga ko‘ra, Ronaldu hanuz Mendesh agentligining mijozlari ro‘yxatida qayd etilgan.
Hozirgi kunga kelib, Ronalduning "Al-Nasr" bilan amaldagi shartnomasi 2027 yilning o‘rtalarigacha davom etadi. Shu sababli uning transferi amalga oshishi uchun jiddiy kelishuvlar talab etiladi.
Ronalduning kelajagi borasida qanday qaror qabul qilinishi esa vaqt o‘tishi bilan ma’lum bo‘ladi.
