Rossiyalik sportchi Ukraina jamoasini qo‘llab-quvvatladi

Milandagi San-Siro stadionida Qishki Olimpiya o‘yinlari ochilish marosimi davomida kutilmagan, ammo juda ta’sirchan voqea sodir bo‘ldi. Bu haqda Zamin.uz xabar berdi.

Rossiyalik Anastasiya Kucherova marosimda Ukraina terma jamoasining tablichkasini ko‘tarib chiqdi. Bu haqda u o‘zining Instagram sahifasida ma’lum qildi va Associated Press agentligiga bergan intervyusida qarorini ochiq tushuntirdi.

Kucherovaning so‘zlariga ko‘ra, Ukraina sportchilari bilan birga yurib borganda, ular Rossiyaga nisbatan qattiq his-tuyg‘ularni boshdan kechirayotganini chuqurroq anglagan. Shunga qaramay, u “hamma odamlar ham bir xil fikrlamasligi”ni ko‘rsatish uchun bu qadamni tashlash muhim, deb hisoblagan.

Ma’lum bo‘lishicha, Kucherova 2018 yildan beri Rossiyaga bormagan va 14 yildan buyon Italiyaning Milanda shaharchasida yashab, arxitektor sifatida faoliyat olib boradi. Ukraina jamoasi tablichkasini ko‘tarib chiqish tashabbusi aynan undan chiqqan.

Avvaliga mamlakatlar tasodifiy taqsimlangan bo‘lsa, keyinchalik xoreograf ishtirokchilardan qaysi davlat bilan chiqishni xohlashlarini so‘ragan. Shu paytda Rossiyada tug‘ilgan Kucherova Ukrainani tanlagan.

Marosimda Kucherova kumushrang kurtkada tablichkani ko‘tarib oldinda yurgan, uning ortidan esa ukrain sportchilari qadam tashlab borgan. Ular orasida konkichi Yelizaveta Sidorko va figurist Kirill Marsak ham bo‘lgan.

Har ikki sportchining otasi urush frontida ekanligi qayd etilgan. Kucherova chiqishdan oldin ukrain sportchilari uning rus ekanini sezib, rus tilida murojaat qilishganini aytdi.

U bu holatni ruslar va ukrainlar o‘rtasidagi “chuqur bog‘liqlik” alomati sifatida qabul qilgan. Tomoshabinlarning jamoani tik turgan holda olqishlaganini ko‘rgan Kucherova o‘zini tutolmay yig‘lab yuborganini tan olgan.

Kucherova, shuningdek, bu harakati Rossiyada qolgan tanishlariga zarar yetkazishi mumkinligini tushunganini, lekin demokratik davlatda yashab, erkinlikdan foydalanib o‘z pozitsiyasini bildirishni muhim deb hisoblaganini ta’kidladi. Ushbu voqea sportdagi natijalardan tashqari, insoniy tanlovlar va ularning kuchli ta’sirini yaqqol namoyon etdi.

Bu sahna uzoq vaqt davomida muhokama qilinishi aniq.